ବାରିପଦା: ମୟୂରଭଞ୍ଜ ଜିଲ୍ଲାରେ ଦିନକୁ ଦିନ ବୃଦ୍ଧି ପାଇବାରେ ଲାଗିଛି ଚୋରି ଲୁଟ୍ ଆଦି ଘଟଣା । ପୋଲିସକୁ ଖୁଲମଖୁଲା ଚ୍ୟାଲେଞ୍ଜ ଦେଇ ଥାନା ନିକଟରୁ ଚୋରି କରିବାରେ ସଫଳ ହେଉଛନ୍ତି ଚୋର । ଚୋରଙ୍କ ବେପରୁଆ ମନୋଭାବକୁ ଦେଖି ଜିଲ୍ଲାରେ ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନ ଉଠିବାରେ ଲାଗିଛି ।
ତେବେ ଆଜି ଗୋଟିଏ ଦିନରେ ଦୁଇଟି ଦୋକାନରୁ ଚୋରି ହୋଇଥିବା ଅଭିଯୋଗ ହୋଇଛି । ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଥାନା ନିକଟରେ ଥିବା ଦୁଇଟି ଦୋକାନର ଟିଣ ଛାତ ଭାଙ୍ଗି ଅନେକ ଜିନିଷ ଚୋରି କରି ନେଇ ଯାଇଛନ୍ତି ଦୁର୍ବୃତ୍ତ । ବାଙ୍ଗିରିପୋଷି ଥାନା ନିକଟରେ ଥିବା ସାହୁ ରୋମିଓ ପଏଣ୍ଟ ମୋବାଇଲ ଦୋକାନ ଓ ଅନ୍ୟ ଏକ ହୋଟେଲରୁ ଚୋରି ହୋଇଥିବା ଅଭିଯୋଗ ହୋଇଛି । ମୁଖ୍ୟ କଥା ହେଉଛି ରାତ୍ରୀକାଳୀନ ପୋଲିସ ପାଟ୍ରୋଲିଂ ଚାଲୁଥିବା ବେଳେ ପୋଲିସକୁ ଖୁଲମଖୁଲା ଚ୍ୟାଲେଞ୍ଜ ଦେଇ ବାଙ୍ଗିରିପୋଷି ଥାନା ନିକଟରୁ 50 ମିଟର ଦୂରରେ ଥିବା ଦୁଇଟି ଦୋକାନର ଟିଣ ଛାତ ଭାଙ୍ଗି ଚୋରି ହୋଇଛି ।
ଅଧିକ ପଢ଼ନ୍ତୁ: Rahul Gandhi Disqualification: ଏପ୍ରିଲ ୨୨ସୁଦ୍ଧା ଘର ଖାଲି କରିବାକୁ ରାହୁଲଙ୍କୁ ନୋଟିସ
ତେବେ ମୋବାଇଲ ଦୋକାନରୁ ଆନୁମାନିକ ପନ୍ଦର ହଜାର ନଗଦ ଟଙ୍କା ସହ ଦାମୀ କମ୍ପାନୀର ମୋବାଇଲ ସବୁ ଚୋରି କରି ନେଇ ଯାଇଛନ୍ତି ଦୁର୍ବୃତ୍ତ । ଦୋକାନ ମାଲିକ ରାତିରେ ଦୋକାନ ବନ୍ଦ କରି ଘରକୁ ଯାଇଥିବା ବେଳେ ଆଜି ସକାଳୁ ଦୋକାନ ଖୋଲିଲା ବେଳକୁ ଦୋକାନରେ ଥିବା ନଗଦ ଟଙ୍କା ଓ ବିଭିନ୍ନ ନାମିଦାମି କମ୍ପାନୀର ମୋବାଇଲ ସବୁ ଚୋରି ହୋଇଛି । ଏନେଇ ଦୋକାନୀ ଗୋପିନାଥ ସାହୁ ବାଙ୍ଗିରିପୋଷି ଥାନାରେ ଏକ ଲିଖିତ ଅଭିଯୋଗ କରିଥିଲେ। ଖବର ପାଇ ବାଙ୍ଗିରିପୋଷି ଥାନା ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ଛାନଭିନ୍ନ ଆରମ୍ଭ କରିଥିଲେ । ପରେ ଅଧିକ ତଦନ୍ତ ପାଇଁ ବାରିପଦାରୁ ସନ୍ଧାନୀ କୁକୁର ଓ ସାଇଣ୍ଟିଫିକ ଟିମ୍କୁ ଡ଼କାଇ ତଦନ୍ତ ଆରମ୍ଭ କରିଛି ପୋଲିସ ।
ପୋଲିସ ଓ ସାଇଣ୍ଟିଫିକ ଟିମ୍ ବିଭିନ୍ନ ଦିଗରୁ ତଦନ୍ତ କରୁଥିବାର ସୂଚନା ରହିଛି । ସେପଟେ ଚୋରି ହୋଇଥିବା ଦୋକାନରେ ଲାଗିଥିବା ସିସିଟିଭି ଫୁଟେଜ ଓ ଅନ୍ୟ ଆଖପାଖ ଦୋକାନ ସମ୍ମୁଖରେ ଥିବା ସିସିଟିଭି ଫୁଟେଜ ଯାଞ୍ଚ କରି ଚୋରି କରିଥିବା ଦୃର୍ବୁତ୍ତମାନଙ୍କୁ ଚିହ୍ନଟ କରିବା ପାଇଁ ପ୍ରୟାସ ଜାରି ରଖିଛି ପୋଲିସ । ତେବେ ସ୍ଥାନୀୟ ଅଞ୍ଚଳ ରାତିରେ କେତେ ସୁରକ୍ଷିତ ସେ ନେଇ ପୋଲିସ ର ପେଟ୍ରୋଲିଂ ଉପରେ ସାଧାରଣରେ ପ୍ରଶ୍ନ ଉଠୁଛି ।
ଇଟିଭି ଭାରତ, ରାଇରଙ୍ଗପୁର
