ରାଇରଙ୍ଗପୁର: ଜଳୁଥିବା ଜୁଇକୁ ଅଧାରୁ ଲିଭାଗଲା । ଅର୍ଦ୍ଧଦଗ୍ଧ ମୃତଦେହକୁ ଜବତ କଲା ରରୁଆଁ ଥାନା ପୋଲିସ। ମୟୂରଭଞ୍ଜ ଜିଲ୍ଲା ରରୁଆଁ ଥାନା ଅନ୍ତର୍ଗତ ଖାପରାସାହି ଗ୍ରାମରେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ପୋଲିସ ଜବତ କରିଥିବା ଅର୍ଦ୍ଧଦଗ୍ଧ ମୃତଦେହ ଖାପରାସାହି ଗ୍ରାମର ଉଜ୍ଜଳ ଗାଗରାଇ ବୋଲି ଜଣାପଡିଛି ।
କେଉଁ ପରିସ୍ଥିତିରେ ଉଜ୍ଜଳ ଗାଗରାଇଙ୍କ ମୃତ୍ୟୁ ହୋଇଛି ସେନେଇ କୌଣସି ତଥ୍ୟ ମିଳିପାରିନାହିଁ। ଗାଁ ଲୋକେ ମିଶି ଶବ ସତ୍କାର କରୁଥିବା ସମୟରେ କେହି ବ୍ୟକ୍ତି ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ପ୍ରଥମେ ଅଗ୍ନିଶମ ବାହିନୀ ପହଞ୍ଚି ଶବ ସତ୍କାର ହେଉଥିବା ଜୁଇକୁ ଲିଭାଇ ଥିଲେ । କିନ୍ତୁ ସେତେବେଳକୁ ମୃତଦେହ ଅଧା ପୋଡ଼ା ହୋଇ ଯାଇଥିଲା ।
ପୋଲିସ ଅର୍ଦ୍ଧଦଗ୍ଧ ମୃତଦେହକୁ ଜବତ କରିବା ସହ ବ୍ୟବଛେଦ ପାଇଁ ପଠାଇଛି । ଶବ ବ୍ୟବଛେଦ ରିପୋର୍ଟ ଆସିବା ପରେ ହିଁ ଘଟଣାର ସତ୍ୟାସତ୍ୟ ଜଣାପଡ଼ିବ । ଏହାକୁ ନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡ଼ା, ଇଟିଭି ଭାରତ
