ମୟୂରଭଞ୍ଜ: ହୁତୁ ହୁତୁ ହୋଇ ଜଳିଗଲା ବୋଲେରୋ । ବାରିପଦା ସଦର ଥାନା ରଙ୍ଗାମାଟିଆ ନିକଟ ପଣ୍ଡିତ ରଘୁନାଥ ମୁର୍ମୁ ମେଡ଼ିକାଲ ପାଖରେ ଘଟିଛି ଏହି ଘଟଣା। ବୋଲେରୋ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଥିବାବେଳେ ବୋଲେରୋରେ କୌଣସି ଯାତ୍ରୀ ବି ନଥିବା ଜଣାପଡିଛି ।
ତେବେ ମଙ୍ଗଳବାର ରାତି 10 ଟାରେ ଏକ ବୋଲେରୋ ଗାଡି ବାରିପଦାରୁ ଚିତ୍ରଡା ରାସ୍ତାରେ ଯାଉଥିଲା । ଦେବେନ୍ଦ୍ରପୁର ଛକରେ ଏକ ଦୁର୍ଘଟଣା ଘଟାଇବା ପରେ ଦ୍ରୁତ ଗତିରେ ଖସି ପଳାଇଥିଲା । ଏହାପରେ ବୋଲେରୋକୁ ପିଛା କରିଥିଲେ କିଛି ଲୋକ । ଏହାପରେ ସେହି ରାସ୍ତାରେ ମେଡିକାଲ କଲେଜ ପାଖରେ ସୁବର୍ଣ୍ଣରେଖା କେନାଲର ପୋଲ କାମ ଚାଲୁଥିବାରୁ ବୋଲେରୋଟି ଖସି ନ ପାରି ଫସି ଯାଇଥିଲା।
ତେବେ ସେହି ବୋଲେରୋ ଗାଡିକୁ କିଏ ନିଆଁ ଲଗାଇ ଦେଇଛି କି କୌଣସି ସର୍ଟସର୍କିଟରୁ ନିଆଁ ଲାଗିଛି ତାହା ଏବେ ସୁଦ୍ଧା ଜଣାପଡି ନାହିଁ । କିନ୍ତୁ ବୋଲେରୋଟି ସମ୍ପୂର୍ଣ୍ଣ ଭାବେ ଜଳି ପୋଡି ପାଉଁଶ ହୋଇଯାଇଛି ।
ଘଟଣାସ୍ଥଳରେ ଅଗ୍ନିଶମ ବିଭାଗର କର୍ମଚାରୀ ପହଞ୍ଚି ନିଆଁ ଲିଭାଇ ଥିବାବେଳେ ବାରିପଦା ସଦର ଥାନା ପୋଲିସ ପହଞ୍ଚି ଅଧିକ ତଦନ୍ତ ଜାରି ରଖିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
