ରାଇରଙ୍ଗପୁର: ବସ ଚାପାରେ ଦୁଇ ମୃତ । ବାଇକ ଆରୋହୀଙ୍କ ଉପରେ ମାଡିଗଲା ବସ । ମୃତ ଦୁଇ ଯୁବକ କେନ୍ଦୁଝର ଜିଲ୍ଲାର ବ୍ରାହ୍ମଣୀପାଳ ଗ୍ରାମର ବୋଲି ଜଣାପଡିଛି ।
ମୟୂରଭଞ୍ଜ ଜିଲ୍ଲା ରରୁଆଁ ଥାନା ଅନ୍ତର୍ଗତ ଖିଚିଂ କରଞ୍ଜିଆ ରାସ୍ତା କାଶିଆ ଜଙ୍ଗଲ ନିକଟରେ ପ୍ରଶାନ୍ତି ଏବଂ ପ୍ରଶାନ୍ତି ନାମକ ଏକ ଘରୋଇ ବସଟି ଦ୍ରୁତ ଗତିରେ ଏକ ମୋଟର ସାଇକେଲକୁ ଧକ୍କାଦେଇ ଦେଇଥିଲା । ଘଟଣାସ୍ଥଳରେ ହିଁ ଶ୍ୟାମ ତିରିଆର ମୃତ୍ୟୁ ହୋଇଥିବାବେଳେ ଅନ୍ୟ ଯୁବକ ବ୍ରଜ ମୋହନ ସିଂ କରଞ୍ଜିଆ ମେଡିକାଲରେ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଛି । ଘଟଣାସ୍ଥଳରେ ରରୁଆଁ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ତେବେ ଦୁର୍ଘଟଣାର ଏକ ଘଣ୍ଟା ପରେ ପ୍ରଶାନ୍ତି ଏବଂ ପ୍ରଶାନ୍ତି ବସ ଡ୍ରାଇଭର କରଞ୍ଜିଆ ଥାନାରେ ଆତ୍ମସମର୍ପଣ କରିଛି । ତେବେ ଦୁଇ ଦିନ ପୂର୍ବରୁ ଟାଟା କରଞ୍ଜିଆ ରାସ୍ତାରେ ବସ ଦୁର୍ଘଟଣାରେ ଜଣେ ଶ୍ରମିକଙ୍କ ମୃତ୍ୟୁ ହୋଇଥିଲା । ଅଞ୍ଚଳରେ ବସ ଦୁର୍ଘଟଣା ବୃଦ୍ଧି ପାଉଥିବାରୁ ସଡକ ସୁରକ୍ଷା ନେଇ ସାଧାରଣରେ ଦାବି ହୋଇଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
