ରାଇରଙ୍ଗପୁର: ବିବାହ ଦିନରେ ବି ଉଦଘାଟନ କଲେ ଫୁଟବଲ ଟୁର୍ଣ୍ଣାମେଣ୍ଟ। ମୟୂରଭଞ୍ଜ ଜିଲ୍ଲା ବହଳଦା ବ୍ଲକ ଅସନା ଗ୍ରାମରେ ଅଭିନବ ଢଙ୍ଗରେ ବାହାଘର। ଇଣ୍ଟରନ୍ୟାସନାଲ ଆଥଲେଟ ପୁର୍ଣ୍ଣିମା ହେମ୍ବ୍ରମ ବାହାଘର ଦିନ ଶ୍ବଶୁର ଘର ଯିବା ପୂର୍ବରୁ 2ଦିନିଆ ଫୁଟବଲ ଟୁର୍ଣ୍ଣାମେଣ୍ଟର ଆୟୋଜନ ଓ ଉଦ୍ଘାଟନ କରି ସମାଜକୁ ଏକ ମହାନ ବାର୍ତ୍ତା ଦେଇଛନ୍ତି ସେ।
ସାଧାରଣତଃ ଜଣେ ଝିଅ ବିଭାଘର ପରେ ନିଜ ଭିତରେ ଥିବା ପ୍ରତିଭା ଓ ଲକ୍ଷ୍ୟକୁ ପଛରେ ଛାଡି ଦେଇଥାଏ। ହେଲେ ପୂର୍ଣ୍ଣିମା ହେମ୍ବ୍ରମ ବିବାହ ଦିନ ହିଁ ଫୁଟବଲ ଟୁର୍ଣ୍ଣାମେଣ୍ଟର ଉଦଘାଟନ କରି ନିଜ ଭିତରେ ଥିବା କ୍ରୀଡାପ୍ରେମକୁ ଦେଖାଇଥିଲେ। ବ୍ୟସ୍ତତା ଭିତରେ ମଧ୍ୟ ସେ ଭୁଲି ଯାଇ ନଥିଲେ ନିଜ ପ୍ରତିଭାକୁ।
ସେ ବିବାହ ପରେ ମଧ୍ୟ ଖେଳିବା ନେଇ ସୂଚନା ଦେଇ ସମାଜକୁ ଓ ଆଗାମୀ ଆଥଲେଟଙ୍କୁ ଏକ ଭଲ ସନ୍ଦେଶ ଦେଇଛନ୍ତି ଯେ, ବିବାହ ପରେ ଜଣେ ଝିଅ ନିଜ ସ୍ବପ୍ନ ସାକାର କରିପାରିବ। ତାଙ୍କ ବିବାହ ଝାଡଖଣ୍ଡ ରାଜ୍ୟର ଅର୍ଜୁନ ହେମ୍ବ୍ରମଙ୍କ ସହ ଆଦିବାସୀ ପରମ୍ପରା ଅନୁଯାୟୀ ସମ୍ପନ୍ନ ହୋଇଥିଲା।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
