ରାଇରଙ୍ଗପୁର: ମହୁମାଛି ଆକ୍ରମଣରେ ଯୁବକଙ୍କ ମୃତ୍ୟୁ ହୋଇଛି । ଯାହାକୁ ପୁରା ଅଞ୍ଚଳରେ ଶୋକର ଛାୟା ଖେଳି ଯାଇଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ସୂଚନା ଅନୁସାରେ ମୟୂରଭଞ୍ଜ ଜିଲ୍ଲା ପାରସିଡିହି ଗାଁର ଯୁବକ କୃଷ୍ଣ ମୁଣ୍ଡା(୨୫) ନିଜ ଗାଁରେ ଏକ ଶୁଦ୍ଧି କ୍ରିୟା କର୍ମରେ ଯୋଗଦେବା ପାଇଁ ଯାଇଥିଲେ । ତେବେ ଶୁଦ୍ଧି କ୍ରିୟା କାର୍ଯ୍ୟ ନିମନ୍ତେ ଗୋଟିଏ ଗଛ ତଳେ ରୋଷେଇ କାର୍ଯ୍ୟ ଚାଲିଥିଲା।
ସେହି ଗଛରେ ବାଘୁଆ ମହୁମାଛି ବସା ବାନ୍ଧି ରହିଥିବା ବେଳେ ରୋଷେଇ ହେଉଥିବା ଚୂଲିର ଧୂଆଁ ଯୋଗୁଁ ବାଘୁଆ ମହୁମାଛି ସେଠାରେ ଥିବା ଲୋକଙ୍କୁ ଆକ୍ରମଣ କରିଥିଲେ । ଫଳରେ କୃଷ୍ଣ ମୁଣ୍ଡା ଗୁରୁତର ହୋଇଥିଲେ। ତାଙ୍କୁ ଚିକିତ୍ସା ପାଇଁ ବିଶୋଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିବା ବେଳେ ଚିକିତ୍ସାଧିନ ଅବସ୍ଥାରେ ତାଙ୍କ ମୃତ୍ୟୁ ଘଟିଥିଲା। ସେପଟେ ଏକମାତ୍ର ରୋଜଗାରକ୍ଷମ ପୁଅକୁ ହରାଇ ପରିବାର ଲୋକେ ଭାଙ୍ଗି ପଡିଛନ୍ତି । ଏ ଘଟଣାକୁ ନେଇ ପୁରା ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
