କୋରାପୁଟ: ରାଜ୍ୟସ୍ତରୀୟ ଆଦିବାସୀ ଓ ଲୋକନୃତ୍ୟ ମହୋତ୍ସବ ପାଳନର ପ୍ରାରମ୍ଭିକ ଉଦଘାଟନୀ ଉତ୍ସବ କୋଟିଆରେ ଡିସେମ୍ବର ୧ ତାରିଖ ଦିନ ଅନୁଷ୍ଠିତ ହେବ ବୋଲି କୋରାପୁଟ ଜିଲ୍ଲାପାଳ ଅବଦଲ ଅକ୍ତର ଜଣାଇଛନ୍ତି । ପରବ ମହୋତ୍ସବର 25 ବର୍ଷ ପୂର୍ତ୍ତିକୁ ରାଜ୍ୟ ସରକାର ମହାଆଡମ୍ବରରେ ପାଳନ କରିବାକୁ ଯୋଜନା ରଖିଥିବା ଜିଲ୍ଲାପାଳ ସୂଚନା ପ୍ରଦାନ କରିଛନ୍ତି ।
ଚଳିତ ବର୍ଷ ଏହି ଉତ୍ସବ ପଞ୍ଚାୟତରୁ ଆରମ୍ଭ ହୋଇ ବ୍ଲକ ଓ ଜିଲ୍ଲା ସଦର ମହକୁମାରେ ପାଳିତ ହେବ । ଡିସେମ୍ବର ୧୭, ୧୮ ଓ ୧୯ ତାରିଖରେ କୋରାପୁଟ ସରକାରୀ ମହାବିଦ୍ୟାଳୟ ପଡ଼ିଆରେ ଆୟୋଜିତ ହେବ । ପରବ-୨୦୨୧ ଉତ୍ସବର ଉଦଘାଟନ କୋଟିଆ ପଞ୍ଚାୟତ ଅନ୍ତର୍ଗତ ନେରେଡିବାଲାସାରେ ନଭେମ୍ବର ଶେଷ ସପ୍ତାହରେ ଆରମ୍ଭ ହେବ ।
ଏଥିରେ ରାଜ୍ୟ ଏସଆରସିଙ୍କ ଦ୍ୱାରା ନଭେମ୍ବର ମାସ ପାଇଁ ଜାରି କରାଯାଇଥିବା ନିର୍ଦ୍ଦେଶନାମାରେ କୌଣସି ବିଶାଳ ଜନସମାଗମ ମେଳା ଆୟୋଜନ ଅନୁମତି ନାହିଁ । ତେଣୁ, ପରବର ପ୍ରାରମ୍ଭିକ ଉତ୍ସବକୁ ଡିସେମ୍ବର ମାସର ୧ ତାରିଖକୁ ଘୁଞ୍ଚାଇ ଦିଆଯାଇଥିବା ଜିଲ୍ଲାପାଳ ସୂଚନା ପ୍ରଦାନ କରିଛନ୍ତି । ଏଥିସହିତ ଉଦଘାଟନୀ ଉତ୍ସବ ନେରେଡିବାଲାସା ପରିବର୍ତ୍ତେ କୋଟିଆରେ ଅନୁଷ୍ଠିତ ହେବ ଏବଂ ସେଠାକୁ କୋଟିଆ ପଞ୍ଚାୟତର ବିଭିନ୍ନ ଗ୍ରାମରୁ ଜ୍ୟୋତି ଅଣାଯିବ ବୋଲି ସେ ଜଣାଇଛନ୍ତି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
