କୋରାପୁଟ : କୋଭିଡ଼ର ଦ୍ଵିତୀୟ ଲହରୀ କୋରାପୁଟ ଜିଲ୍ଲାରେ ଏ ପର୍ଯ୍ୟନ୍ତ ଗୋଟିଏ ଦିନରେ ସଂକ୍ରମିତଙ୍କ ସଂଖ୍ୟା 200 ଟପିନାହିଁ । ତେବେ ଦ୍ଵିତୀୟ ଲହରୀରେ ଆଜି ପର୍ଯ୍ୟନ୍ତ 1262 ଜଣ କୋଭିଡ଼ ସଂକ୍ରମଣର ଶିକାର ହୋଇଥିବାବେଳେ ଆଜି 142 ଜଣ ନୂତନ ଭାବେ ସଂକ୍ରମିତ ହୋଇଥିବା ସରକାରୀ ତଥ୍ୟରୁ ଜଣାପଡିଛି । କିନ୍ତୁ, କୋରାପୁଟ ଜିଲ୍ଲାର ସହର ଗୁଡିକର ଦୋକାନ ବଜାରରେ ପ୍ରତିଦିନ ଦେଖାଯାଉଥିବା ଅସମ୍ଭାଳ ଗହଳିକୁ ଦେଖିଲେ ଜିଲ୍ଲାର ସ୍ଥିତି ଏପରି ଆଉ କେତେଦିନ ରହିପାରିବ ସେନେଇ ସନ୍ଦେହ ସୃଷ୍ଟି ହୋଇଛି ।
ଗତ ଦୁଇ ଦିନର ସପ୍ତାହନ୍ତ ସଟଡାଉନ ପରେ ଆଜି ସକାଳ 6ଟା ଠାରୁ ମଧ୍ୟାହ୍ନ 12ଟା ପର୍ଯ୍ୟନ୍ତ ଦୋକାନ ବଜାର ଖୋଲା ହେବା ପରେ ସରକାରଙ୍କ ସମସ୍ତ କୋଭିଡ଼ ନିୟମାବଳୀକୁ ଭାଙ୍ଗି ରାସ୍ତା ଉପରେ ଏବଂ ବଜାର ଘାଟରେ ଜନସମୁଦ୍ର ଦେଖିବାକୁ ମିଳିଥିଲା । ଘର ପାଖରୁ 500 ମିଟର ଦୂରତାରେ ଚାଲିଚାଲି ଅତ୍ୟାବଶ୍ୟକୀୟ ଜିନିଷ କିଣିବା ପାଇଁ ଅନୁମତି ଥିବାବେଳେ ହଜାର ହଜାର ଗାଡି ମଟର କୋରାପୁଟର ଗଳିକନ୍ଦିରେ ଦେବାକୁ ମିଳିଥିଲା ।
ଫଳସ୍ୱରୂପ ସହରର ପ୍ରତିଟି ରାସ୍ତାରେ ଗାଡ଼ି ମଟର ଏପରିକି ପଦଯାତ୍ରୀଙ୍କ ଯିବା ଆସିବାରେ ସମସ୍ୟା ଦେଖା ଦେଇଥିଲା । ହଜାର ହଜାର ସଂଖ୍ୟାରେ କୋଭିଡ ନିୟମ ଭାଙ୍ଗୁଥିବା ଅମାନିଆଙ୍କ ପାଇଁ ହାତଗଣତି ପୋଲିସ ଏକ ପ୍ରକାର ନିରୁପାୟ ହୋଇପଡିଥିବା ଦେଖାଯାଇଥିଲା । ନିଜ ସ୍ଥିତି ଜାହିର କରିବା ପାଇଁ କିଛି ଟ୍ରାଫିକ କନଷ୍ଟେବଳ କିଛି ଗାଡିକୁ ଅଟକାଇ ଫାଇନ ଆଦାୟ କରୁଥିବାବେଳେ ଅନେକ କୋରୋନାର ବିପଦକୁ ଭୃକ୍ଷେପ ନକରି ପରିବାରବର୍ଗଙ୍କ ସହ ପୋଲିସର ଅସହାୟ ସ୍ଥିତିର ଫାଇଦା ଉଠାଇ ଖସି ଯିବାରେ ସମର୍ଥ ହେଉଥିଲେ । ତେବେ କୋଭିଡ଼ର ନିୟମକୁ ବେଖାତିର କରୁଥିବା ଜନତାଙ୍କ ଏପରି ବେପରୁଆ ମନୋଭାବ ଜିଲ୍ଲାରେ କୋଭିଡ଼ର ସ୍ଥିତିକୁ କେଉଁ ମୋଡ ଦେବ ତାହା କେବଳ ସମୟ ହିଁ କହିବ ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
