କୋରାପୁଟ: ଜିଲ୍ଲାର ବିଭିନ୍ନ ପ୍ରାନ୍ତରୁ ଆସିଥିବା ଆଦିବାସୀ ମହିଳାଙ୍କୁ ନେଇ ଓଡ଼ିଶା ଲଳିତ କଳା ଏକାଡେମୀରେ ବୁଧବାର ଠାରୁ ଏକ ଦୁଇ ଦିନିଆ ଚିତ୍ରକଳା କର୍ମଶାଳା ଆରମ୍ଭ ହୋଇଯାଇଛି । ଏହି କର୍ମଶାଳାରେ ଭାଗ ନେଇଥିବା 30 ଜଣ ଆଦିବାସୀ ମହିଳା କଳାକାର ସେମାନଙ୍କ ନିଜ ଭାବନାରେ ଆଦିବାସୀ କଳା, ସଂସ୍କୃତି ଓ ପରମ୍ପରାକୁ କାନଭାସ ଉପରେ ଚିତ୍ର ଆଙ୍କି ପ୍ରକାଶ କରିବେ ବୋଲି ଓଡ଼ିଶା ଲଳିତ କଳା ଏକାଡେମୀର ସମ୍ପାଦକ ପଞ୍ଚାନନ ସାମଲ ଜଣାଇଛନ୍ତି ।
ସେମାନଙ୍କ ଦ୍ୱାରା ପ୍ରସ୍ତୁତ କାନଭାସକୁ ପ୍ରଥମେ କୋରାପୁଟର ଆଞ୍ଚଳିକ କଳା ପ୍ରଦର୍ଶନ କେନ୍ଦ୍ରରେ ପ୍ରଦର୍ଶିତ କରିବା ପରେ ଏହି ସମସ୍ତ କଳାକୃତିକୁ ଭୁବନେଶ୍ୱରରେ ପ୍ରଦର୍ଶିତ କରାଯିବ ବୋଲି ସାମଲ ଜଣାଇଛନ୍ତି । ପରବର୍ତ୍ତୀ ପର୍ଯ୍ୟାୟରେ ଏଥିମଧ୍ୟରୁ କିଛି ଉନ୍ନତ ମାନର କୃତିକୁ ଏକାଡେମୀ ତରଫରୁ ଜାତୀୟ ସ୍ତରକୁ ପ୍ରେରଣ କରିବାର ଯୋଜନା ରହିଥିବା ସେ ସୂଚନା ପ୍ରଦାନ କରିଛନ୍ତି । ଏପରି କାର୍ଯ୍ୟକ୍ରମ ମାଧ୍ୟମରେ ଆଦିବାସୀ ମହିଳାଙ୍କ ମଧ୍ୟରେ ଲୁକ୍କାୟିତ ପ୍ରତିଭାକୁ ପ୍ରୋତ୍ସାହନ ମିଳିବ ବୋଲି ସାମଲ ମତ ରଖିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
