କୋରାପୁଟ: ଏବେ ପ୍ରତ୍ୟେକ ଘରକୁ ଜଳ ଯୋଗାଣ ସହ ପିଲାଙ୍କ ପାଖରେ ପହଞ୍ଚିବ ଉନ୍ନତ ମାନର ଶିକ୍ଷା । କେନ୍ଦ୍ର ସରକାର ଏଭଳି ଲକ୍ଷ୍ୟ ରଖିଛନ୍ତି ବୋଲି ଜଣାଇଛନ୍ତି କେନ୍ଦ୍ର ଆଦିବାସୀ କଲ୍ୟାଣ ମନ୍ତ୍ରୀ ବିଶେଶ୍ବର ଟୁଡୁ । ଗତକାଲି(ଶନିବାର) କୋରାପୁଟ ଆସି ସେ ଜଳ ଯୋଗାଣ ଓ ଆଦିବାସୀ କଲ୍ୟାଣ ବିଭାଗର ଅଧିକାରୀଙ୍କ ସହ ଏକ ସମୀକ୍ଷା ବୈଠକରେ ଯୋଗ ଦେଇଥିଲେ ଏବଂ ଜିଲ୍ଲାରେ ଘର ଘର ଜଳ ଯୋଜନା ଓ ଏକଲବ୍ୟ ବିଦ୍ୟାଳୟ ପ୍ରତିଷ୍ଠାର ଅଗ୍ରଗତି ସମ୍ପର୍କରେ ସମୀକ୍ଷା କରିଥିଲେ ।
ବିଭିନ୍ନ ଛୋଟ ବଡ ସମସ୍ୟା ମଧ୍ୟ ଦେଇ ଜଳ ଯୋଗାଣ କାର୍ଯ୍ୟ ଆଗକୁ ଚାଲିଥିବା ବେଳେ ଏକଲବ୍ୟ ବିଦ୍ୟାଳୟ ପ୍ରତିଷ୍ଠା କରିବାରେ ଯୋଜନା ଆଣ୍ଠେଇ ପଡିଥିବା ଦେଖାଦେଇଛି । ଜିଲ୍ଲାରେ 9ଟି ଏକଲବ୍ୟ ବିଦ୍ୟାଳୟ ନିର୍ମାଣ ପାଇଁ ମଞ୍ଜୁର ହୋଇଥିଲେ ହେଁ କେବଳ ଗୋଟିଏର କାମ ସମ୍ପନ୍ନ ହୋଇପାରିଥିବା ସେ ସାମ୍ବାଦିକଙ୍କୁ ସୂଚନା ପ୍ରଦାନ କରିଛନ୍ତି ।
ଏହାସହ ବିଭାଗୀୟ ଅଧିକାରୀ ଆସନ୍ତା ଦିନରେ ଏହି ପ୍ରକଳ୍ପରେ ମଧ୍ୟ ଦ୍ରୁତ ଅଗ୍ରଗତି ଆଣିବାର ପ୍ରତିଶ୍ରୁତି ଦେଇଥିବା ସେ ସୂଚନା ଦେଇଛନ୍ତି । ଏପଟେ ଗତକାଲି ମନ୍ତ୍ରୀଙ୍କୁ ବିଜେପି ଦଳ ତରଫରୁ ସମ୍ବର୍ଦ୍ଧିତ କରାଯାଇଥିଲା ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
