ଖୋର୍ଦ୍ଧା: ଦିନ ଥିଲା ଗାଁ ଦାଣ୍ଡରେ ଜମୁଥିଲା ପାରମ୍ପରିକ ଖେଳର ଆସର । ଆମ୍ବ ତୋଟା ହେଉ କିମ୍ବା ଚାନ୍ଦିନୀ ... ଟିକେ ଫାଙ୍କା ସମୟ ମିଳିଲା ମାନେ ଏକାଠି ହୋଇ ଖେଳିବାକୁ ବସି ପଡୁଥିଲେ । ବୋହୁଚୋରି, କବାଡି, ଢୁ ଢୁ, ସେକାସେକି, ଗୋବ, ବାଟି, ନଟୁ ଭଳି ଅନେକ ଖେଳ ଖେଳି ପିଲାଦିନର ସ୍ମୃତିକୁ ସୁନ୍ଦର ଭାବେ ଆଙ୍କୁଥିଲେ ପିଲା । ଛୁଆଙ୍କ ହୋ ହାଲ୍ଲାରେ ଉଠୁଥିଲା ପଡୁଥିଲା ଗାଁ ଦାଣ୍ଡ । ହେଲେ ଯୁଗ ବଦଳିବା ସହ ପିଲାଙ୍କ ଖେଳର ଶୈଳୀ ମଧ୍ୟ ବଦଳିବାରେ ଲାଗିଲା ।
ଗାଁ ଦାଣ୍ଡରେ ଦେଖିବାକୁ ମିଳିଲାନି ମୁନା ମୁନିଙ୍କ ଭିଡ । ଶୁଭିଲାନି ସେ ପିଲାଖେଳର କୋଳାହଳ । କାରଣ ସେମାନେ ସ୍ମାର୍ଟ ଫୋନର ସ୍ମାର୍ଟ ଗେମରେ ବ୍ୟସ୍ତ ଥିଲେ । ଚାଇନା ଗେମ ପବଜି ପ୍ରେମରେ ଉବୁଟୁବୁ ଥିଲେ ଛୁଆଠୁ ବୁଢା । ଗାଁ ଦାଣ୍ଡ ଧୂଳିର ମଜା ବା କେମିତି ଜାଣିବେ । ହେଲେ ଭାରତ ସରକାର ଚାଇନିଜ ଆପକୁ ବ୍ୟାନ କରିବା ପରେ ହସିଉଠିଛି ଗା ଦାଣ୍ଡ । ଆଉ ଫେରିଛି ପୁରୁଣା ଦିନର ସେ ପାରମ୍ପରିକ ଖେଳ ।
ଏ ହେଉଛି ଖୋର୍ଦ୍ଧାର ଦୃଶ୍ୟ । ଯେଉଁଠି ପବଜି ବ୍ୟାନ ହେବା ପରେ ପୁଣି ସାଙ୍ଗସାଥୀମାନେ ଏକାଠି ହୋଇ ପାରମ୍ପରିକ ଗୁଲି କବାଡି ଖେଳ ଆଦି ଖେଳୁଛନ୍ତି । ଏବେ ପିଲାମାନେ ଅନଲାଇନରେ ପାଠ ପଢି ସାରି ଗାଁ ଦାଣ୍ଡକୁ ଧାଇଁ ଆସୁଛନ୍ତି ଖେଳକୁଦ ପାଇଁ । ଯେଉଁଥିରେ ପିଲାଙ୍କ ମାନସିକ ଓ ଶାରିରୀକ ସ୍ବାସ୍ଥ୍ୟ ଉଭୟ ସୁସ୍ଥ ରହୁଥିବା କୁହାଯାଉଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
