ଖୋର୍ଦ୍ଧା: ଜିଲ୍ଲା ବାଙ୍କୋଇ ଫାଣ୍ଡି ଅନ୍ତର୍ଗତ ବେଣାଗାଡିଆ ଅଞ୍ଚଳରେ ଅଭାବନୀୟ ଘଟଣା । ଆଜି(ସୋମବାର) କୂଅରୁ ଯୁବକଙ୍କ ମୃତଦେହ ଉଦ୍ଧାର । ଯୁବକ ଜଣକ ବେଣାଗାଡିଆ ଗ୍ରାମର ବିଜୟ ବରାଡ ହୋଇଥିବା ସୂଚନା । ଜଣେ ମହିଳା ବିଜୟଙ୍କୁ ହତ୍ୟା କରି କୂଅରେ ଫିଙ୍ଗି ଦେଇଥିବା ନେଇ ଅଭିଯୋଗ ଆଣିଲେ ପରିବାର ଲୋକେ । ବୋଲଗଡ ଥାନା ପୋଲିସ ଆଇଆଇସି ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ପରିବାର ଲୋକଙ୍କ ସୂଚନା ଅନୁଯାୟୀ, ରବିବାର ଦିନ ବେଣାଗାଡିଆ ଗ୍ରାମର ବିଜୟ ବରାଡଙ୍କୁ ସେହି ଗ୍ରାମର ଜଣେ ମହିଳା ସୁଷମା ବରାଡ ବିଲକାମ କରିବାକୁ ଡାକି ନେଇଥିଲେ । କିନ୍ତୁ ବିଜୟ ସନ୍ଧ୍ୟା ହେବାରୁ ଘରକୁ ନଫେରିବାରୁ ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରି ମଧ୍ୟ ବିଜୟଙ୍କୁ ପାଇନଥିଲେ । କାମକୁ ଡାକି ନେଇଥିବା ମହିଳାଙ୍କ ଘରକୁ ଯାଇ ପଚାରିବାରୁ ମହିଳା ଜଣକ କୂଅକୁ ଯାଇ ଦେଖ କହିଥିଲେ । ଏହାପରେ ଗ୍ରାମବାସୀ ସହ ପରିବାର ଲୋକେ ମା’ ତରେଇଶୁଣୀ ଠାକୁରାଣୀ କୂଅରେ ବିଜୟ ପଡିଥିବାର ଦେଖିବାକୁ ପାଇଥିଲେ । ତୁରନ୍ତ ଯୁବକଙ୍କୁ ଉଦ୍ଧାର କରାଯାଇ ବାଙ୍କୋଇ ଗୋଷ୍ଠୀ କେନ୍ଦ୍ରରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ ।
ଏହାମଧ୍ୟ ପଢନ୍ତୁ.. ରାସ୍ତାକଡ଼ରୁ ମିଳିଲା ଯୁବକଙ୍କ ମୃତଦେହ, ହତ୍ୟା ସନ୍ଦେହରେ ରାସ୍ତାରୋକ
ଏହାମଧ୍ୟ ପଢନ୍ତୁ.. ସାତ ଜନ୍ମର ପ୍ରତିଶୃତି 3 ମାସ ବି ଚାଲିଲାନି: ସ୍ତ୍ରୀକୁ ହତ୍ୟା କରି ହାତ ଗୋଡ କାଟି ନଦୀକୁ ପିଙ୍ଗି ଦେଲା ସ୍ବାମୀ
ତେବେ ଏହାକୁ ନେଇ ହସ୍ପିଟାଲ ପରିସରରେ ଉତ୍ତେଜନା ସ୍ଥିତି ଦେଖିବାକୁ ମିଳିଥିଲା । ସୁଷମା ବରାଡଙ୍କୁ ଗିରଫ କରିବା ଦାବିରେ ବିଳମ୍ୱିତ ରାତିରେ ବାଙ୍କୋଇ ଫାଣ୍ଡି ଘେରାଉ କରିଥିଲେ ଗ୍ରାମବାସୀ । ପରେ ବୋଲଗଡ ପୋଲିସ ସୁଷମାକୁ ଥାନାରେ ଅଟକ ରଖି ପଚରାଉଚରା ଜାରି ରଖିଛି । ବୋଲଗଡ ଥାନା ଅଧିକାରୀ ଓ ବାଙ୍କୋଇ ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି କୂଅ ପାଖରେ ପଡିଥିବା ରକ୍ତ ନମୁନା ସଂଗ୍ରହ କରିବା ସହ ଆଖପାଖ ଅଞ୍ଚଳ ଅନୁଧ୍ୟାନ କରିଛନ୍ତି । ତେବେ ସୁଷମା ବରାଡ ହିଁ ଡାକିନେଇ ତାଙ୍କୁ ହତ୍ୟା କରିଥିବା ପରିବାର ପକ୍ଷରୁ ଅଭିଯୋଗ କରାଯାଇଛି । ସୁଷମା ବରାଡ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ପରିବାର ପକ୍ଷରୁ ଦାବି କରାଯାଇଛି ।
ତେବେ ଏହା ହତ୍ୟା ନା ଏହା ପଛରେ ଆଉ କେଉଁ କାରଣ ରହିଛି ତାହା ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଥିବା ବେଳେ ଜନଗହଳି ସ୍ଥାନରେ କିଭଳି ଏହି ଘଟଣା ଘଟିଲା ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ସତ ସାମ୍ନାକୁ ଆସିପାରେ ।
ଇଟିଭି ଭାରତ, ଖୋର୍ଦ୍ଧା
