ଖୋର୍ଦ୍ଧା: ନିଶା ମାଫିଆଙ୍କ ହବ୍ ପାଲଟିଲାଣି ଖୋର୍ଦ୍ଧା । ବିଶେଷକରି ବ୍ରାଉନସୁଗାର କାରବାରରେ ଯୁବଗୋଷ୍ଠୀର ସମ୍ପୃକ୍ତି ପୋଲିସର ମୁଣ୍ଡ ବିନ୍ଧାର କାରଣ ସାଜୁଥିବା ବେଳେ ଏଥିପାଇଁ ବିଭିନ୍ନ ସମୟରେ ବଡ଼ ବଡ଼ ଅପରାଧ ମଧ୍ୟ ଘଟୁଥିବା ଦେଖିବାକୁ ମିଳୁଛି । ସେହିପରି ସୋମବାର ବିଳମ୍ବିତ ରାତିରେ ଆଦର୍ଶ ଥାନା ଅଞ୍ଚଳରେ ବ୍ରାଉନସୁଗାର ବେପାରକୁ ନେଇ ଜଣେ ଯୁବକଙ୍କୁ ଗୁଳିମାଡ଼ ହୋଇଛି । ଏହି ଯୁବକଙ୍କ ନାମ ବବୁଲ ବୋଲି ପରିଚୟ ମିଳିଛି । ତାଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି । ଏନେଇ ଖବର ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ, ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ପାନବରଜ ଗ୍ରାମରେ ଗତକାଲିି (ସୋମବାର) ରାତି ପ୍ରାୟ ୧୦ଟାରେ ଏହି ଗୁଳିମାଡ ହୋଇଛି । ବବୁଲ ନାମକ ଯୁବକଙ୍କ ଡାହାଣ ଛାତିରେ ଗୁଳି ବାଜିଛି । ତାଙ୍କୁ ପ୍ରଥମେ ଖୋର୍ଦ୍ଧା ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ଅବସ୍ଥା ଗୁରୁତର ହେବାରୁ ଭୁବନେଶ୍ଵର ସ୍ଥାନାନ୍ତରିତ କରାଯାଇଛି । କିନ୍ତୁ ଏଯାଏଁ ଯଦିଓ ଗୁଳିମାଡ଼ ପଛର କାରଣ ସ୍ପଷ୍ଟ ହୋଇନାହିଁ ତଥାପି ବ୍ରାଉନସୁଗାର ବେପାରଙ୍କୁ ନେଇ ଆଦର୍ଶ ଥାନା ଅନ୍ତର୍ଗତ ଭାଲିଆବାଡ଼ି ଗ୍ରାମର ଜଣେ ଯୁବକ ବବୁଲଙ୍କୁ ଗୁଳି କରିଥିବା ଖବର ମିଳିଛି ।
ଏହାମଧ୍ୟ ପଢନ୍ତୁ: Royals feud: ବଲାଙ୍ଗୀର ରାଜପରିବାର ବିରୋଧରେ ଘରୋଇ ହିଂସା ଅଭିଯୋଗ
