ଖୋର୍ଦ୍ଧା: ବେଗୁନିଆ ଥାନା ଧଳାପଥର ଫାଣ୍ଡି ଅଞ୍ଚଳରେ ଦିନକୁ ଦିନ ବଢିବାରେ ଲାଗିଛି ଦେଶୀ ରନ୍ଧା ମଦ ପ୍ରସ୍ତୁତି ଓ କାରବାର । ପୋଲିସର ଜାଣତରେ ଚାଲିଥିବା ନେଇ ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା ।
ସୂଚନାଅନୁସାରେ, ମାଣିବନ୍ଧ ପଞ୍ଚାୟତର ବିଭିନ୍ନ ଗ୍ରାମରେ ଥିବା ନିଛାଟିଆ ଜଙ୍ଗଲରେ ଚାଲୁଛି ଦେଶ ମଦ ଭାଟି । ମଦ କାରବାର ସମ୍ପର୍କରେ ଧଳାପଥର ଫାଣ୍ଡି ଅଧିକାରୀଙ୍କୁ ସ୍ଥାନୀୟ ଲୋକମାନେ ବାରମ୍ବାର ଅଭିଯୋଗ କଲେ ମଧ୍ୟ ଫାଣ୍ଡି ଅଧିକାରୀ କୌଣସି କାର୍ଯ୍ୟାନୁଷ୍ଠାନ ନେଉନଥିବା ସାଙ୍ଘାତିକ ଅଭିଯୋଗ କରିଛନ୍ତି ସ୍ଥାନୀୟ ଲୋକେ । ଫାଣ୍ଡି ଅଧିକାରୀଙ୍କୁ ମୋଟା ଅଙ୍କର ହାତଗୁଞ୍ଜା ଦେଇ ମଦମାଫିଆ ମାନେ ଅବାଧରେ ବ୍ୟବସାୟ ଚଳାଉଛନ୍ତି ।
ସେହିପରି ମାଣିବନ୍ଧ ପଞ୍ଚାୟତର ସାମନ୍ତରାପୁରରେ 10 ରୁ 15 ମଦ ଭାଟି ଚଳାଇଥିବା ବେଳେ ପୋଲିସ ସବୁ ଜାଣି ଚୁପ ରହୁଛନ୍ତି ଏବଂ ମଦ ମାଫିଆଙ୍କ ପାଇଁ ଗାଁର ଯୁବକମାନେ ବିପଥଗାମୀ ହେଉଥିବା ଅଭିଯୋଗ କରିଛନ୍ତି । ତୁରନ୍ତ ମଦ ମାଫିଆଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ସହ ବେଆଇନ ମଦ ଭାଟି ବନ୍ଦ କରାନଗଲେ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛନ୍ତି ସ୍ଥାନୀୟଲୋକେ ।
ଇଟିଭି ଭାରତ, ଖୋର୍ଦ୍ଧା
