ଖୋର୍ଦ୍ଧା: ଐତିହ୍ୟ ଓ ସଂସ୍କୃତିରେ ପରିପୂର୍ଣ୍ଣ ଓଡିଶା । ବିବିଧ କଳା ଓ ପରମ୍ପରାର ଆଧାରରେ ଏହା ବଳିୟାନ । ପ୍ରାଚୀନ ପାଷାଣ ଯୁଗରେ ମନ୍ଦିରର ଚାରି କାନ୍ଥ ମଧ୍ୟରେ ବିଭିନ୍ନ ମୂଦ୍ରା ଓ ଭଙ୍ଗୀରେ ଦେବଦାସୀମାନେ ପରିବେଷଣ କରୁଥିଲେ ନିଜ ମନର ଭାବନା ଓ ଅନୁଭୂତି । ଯାହାକୁ ପରବର୍ତ୍ତୀ ସମୟରେ ମିଳିଲା ଓଡିଶୀ ନୃତ୍ୟର ନାମ । ଆଜି ବି ଓଡିଶୀ ନୃତ୍ୟର ନାମ ଉଠିଲେ ମନରେ ଭାସି ଆସେ ଓଡିଶା ଓ ଏହାର ବଳିଷ୍ଠ ସଂସ୍କୃତି । ତେବେ ଦେଖିବାକୁ ଆକର୍ଷଣୀୟ ଲାଗୁଥିବା ଏହି ନୃତ୍ୟ କଳାରେ ଖୁବ କମ୍ ବୟସରେ ପାରଦର୍ଶୀତା ହାସଲ କରିଛନ୍ତି ଖୋର୍ଦ୍ଧା ଜିଲ୍ଲା ଜଟଣୀର ରାମଚନ୍ଦ୍ରପୁରର ସୁଭାଶ୍ରୀତା ମହାପାତ୍ର । ମାତ୍ର 10 ବର୍ଷ ବୟସରେ ନିଜର କଳାକୁ ନେଇ ସେ ବିଶ୍ବ ଦରବାରରେ ପରିଚିତ ।
ମା’ଙ୍କ ପାଖରେ ବସି ଛୁଆଟି ଦିନରୁ ଦେବଦାସୀ ପରମ୍ପରା କଥା ଶୁଣୁଥିଲେ ସୁଭାଶ୍ରୀତା । ଯାହା ଓଡିଶୀ ନୃତ୍ୟ ପ୍ରତି ବଢାଇଥିଲା ତାଙ୍କର ଦୁର୍ବଳତା । ଆଉ ଏହାପରେ ପରିବାରର ସହଯୋଗରେ ମାତ୍ର 4 ବର୍ଷ ବୟସରୁ ସେ ଆରମ୍ଭ କରିଥିଲେ ନୃତ୍ୟ ସାଧନା । ବର୍ତ୍ତମାନ ପଞ୍ଚମ ଶ୍ରେଣୀରେ ପାଠ ପଢ଼ୁଥିବା ମାତ୍ର 10 ବର୍ଷୀୟା ସୁଭାଶ୍ରୀତା ନିଜ କଠିନ ପରିଶ୍ରମ ବଳରେ ଓଡିଶୀ ନୃତ୍ୟର ସାଧନା କରି ଅନେକ ଛୋଟ ବଡ ମଞ୍ଚରେ ନୃତ୍ୟ ପରିବେଷଣର ସୁଯୋଗ ପାଇଛନ୍ତି । ଏହାଛଡା 2017 ଓ 2018ରେ ବିଶ୍ବ ଓଡିଶୀ ଉତ୍ସବ, 2019ରେ ପୁରୀରେ ଅନୁଷ୍ଠିତ ଅନ୍ତର୍ଜାତୀୟ ପୁରୀ ଡ୍ୟାନ୍ସ ଫେଷ୍ଟିଭାଲ ଓ ପୁରୀ ପରିକ୍ରମାରେ ସେ ନିଜ ନୃତ୍ୟ ଯାଦୁରେ ସଭିଙ୍କୁ ମୁଗ୍ଧ କରିଥିଲେ । ତାଙ୍କ ନୃତ୍ୟ ଯାଦୁରେ ବିମୋହିତ ହୋଇ ବଡଦାଣ୍ଡର ପଣ୍ଡାମାନେ ତାଙ୍କୁ ମନ୍ଦିର ଭିତରକୁ ଯାଇ ମହାବାହୁଙ୍କ ଆଗରେ ନୃତ୍ୟ ପରିବେଷଣ କରିବାକୁ ପାଛୋଟି ନେଇଥିଲେ । ଆଗକୁ ଯାଇ ଦିନେ ରଥଯାତ୍ରାରେ ଝିଅ ମହାବାହୁଙ୍କ ପାଇଁ ଓଡିଶୀ ନୃତ୍ୟ ପରିବେଷଣ କରିବ ବୋଲି ଆଶା ରଖିଛନ୍ତି ମା’ ।
ବର୍ତ୍ତମାନ କୋରୋନା ମହାମାରୀ ସମୟରେ ଲକଡାଉନ ଲାଗି ରହିଥିବା ବେଳେ ଏହି ସମୟର ସୁଯୋଗ ନେଇ ସେ ଘରେ ବସି ବିଭିନ୍ନ ଅନଲାଇନ ପ୍ରତିଯୋଗିତା ଓ କର୍ମଶାଳାରେ ମଧ୍ୟ ଭାଗ ନେଇଥିଲେ । ଝିଅର ଏହି ଅନନ୍ୟ ପ୍ରତିଭାକୁ ଦେଖି ବାପା ମା’ ତାଙ୍କୁ ପ୍ରଭୁ ଜଗନ୍ନାଥଙ୍କ ପାଖରେ ସମର୍ପି ଦେଇଛନ୍ତି । ତେବେ ଆଗକୁ ଯଦି ଝିଅକୁ କିଛି ସରକାରୀ ପ୍ରୋତ୍ସାହନ ମିଳନ୍ତା ତେବେ ସୁଭାଶ୍ରୀତା ରାଜ୍ୟ ତଥା ଦେଶର ନା’ ରଖିବା ସହ ନିଜ କଳାକୁ ଅଧିକ ପ୍ରସ୍ଫୁଟିତ କରିପାରିବ ବୋଲି କହିଛନ୍ତି ବାପା ମା’ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
