ଭୁବନେଶ୍ବର: ଦେବଗଡବାସୀଙ୍କୁ ଫମ୍ପା ପ୍ରତିଶ୍ରୁତି ଦେଉଛନ୍ତି ବିଜେପି ନେତା । ୨୦୧୯ ନିର୍ବାଚନୀ ରାଲିରେ ଦେଇଥିବା ମାଳ ମାଳ ପ୍ରତିଶ୍ରୁତି ପାଳନ କଲେନାହିଁ । ଓଡ଼ିଶାର ୭ ଲକ୍ଷ PMAY ଘରକୁ ଷଡଯନ୍ତ୍ର କରି ରୋକିଛନ୍ତି ବିଜେପି ସାଂସଦ । ରାଜନୀତିରେ ତିଷ୍ଠି ରହିବା ପାଇଁ ଓଡିଶାବାସୀଙ୍କୁ ଅପମାନିତ କରୁଛନ୍ତି । ଦେବଗଡରେ ରାଜ୍ୟ ସରକାରଙ୍କୁ ଧର୍ମେନ୍ଦ୍ର ପ୍ରଧାନଙ୍କ ଟାର୍ଗେଟର ଏପରି ଜବାବ ରଖିଛନ୍ତି ବିଜେଡି ସାଂସଦ ଡ଼ ସସ୍ମିତ ପାତ୍ର । ସସ୍ମିତ କହିଛନ୍ତି ଯେ, ଓଡ଼ିଶା ବିଜେପିର ଜଣେ ବରିଷ୍ଠ ନେତା ଦେବଗଡ ଗସ୍ତରେ ଯାଇଥିଲେ । ଗ୍ରାମାଞ୍ଚଳ ଗୃହ ବିଷୟରେ ସେ ଯାହା କହିଥିଲେ ତାହା ଅତ୍ୟନ୍ତ ବିଡମ୍ବନାର ବିଷୟ । ଦିଲ୍ଲୀର କେନ୍ଦ୍ର ଗ୍ରାମ୍ୟ ଉନ୍ନୟନ ମନ୍ତ୍ରୀଙ୍କୁ ଭେଟି ଓଡ଼ିଶା ପାଇଁ ୭ ଲକ୍ଷ PMAY ଗୃହକୁ ବିଜେପି ସାଂସଦ ଷଡଯନ୍ତ୍ର କରି ଅଟକାଇଥିଲେ । ତାହା ଏହି ନେତା ଜଣଙ୍କ ସ୍ପଷ୍ଟ କରିବା ଉଚିତ ।
ବିଗତ ୯ ବର୍ଷରେ ଏହି ନେତା ଜଣଙ୍କ ଦେବଗଡକୁ କେତେ ବିକାଶମୂଳକ ପ୍ରକଳ୍ପ ଆଣିଛନ୍ତି, ଦେବଗଡରେ ନେତା କେତେ କେନ୍ଦ୍ରୀୟ ବିଦ୍ୟାଳୟ, ବିଶ୍ୱବିଦ୍ୟାଳୟ, ଶିକ୍ଷା ପ୍ରତିଷ୍ଠାନ ଆରମ୍ଭ କରିଛନ୍ତି ତାହାର ଉତ୍ତର ରଖିବାକୁ ଦାବି କରିଛନ୍ତି । ସସ୍ମିତ ପାତ୍ର ଏକ ପ୍ରେସ ବିବୃତ୍ତିରେ କହିଛନ୍ତି ଯେ, ୨୦୧୯ରେ ନିର୍ବାଚନୀ ରାଲିରେ ଏହି ନେତା ଜଣଙ୍କ ଦେଇଥିବା ପ୍ରତିଶ୍ରୁତି କେବେ ବାସ୍ତବରେ ପରିଣତ ହେବ ସେନେଇ ସେ ଦେବଗଡବାସୀଙ୍କୁ ସ୍ପଷ୍ଟ କରିବା ଉଚିତ । ୨୦୧୯ର ନିର୍ବାଚନୀ ପୂର୍ବ ରାଲିରେ ଏହି ନେତା ଦେବଗଡରେ ଖାଦ୍ୟ ପ୍ରକ୍ରିୟାକରଣ କ୍ଲଷ୍ଟର ଆରମ୍ଭ କରିବାକୁ ପ୍ରତିଶ୍ରୁତି ଦେଇଥିଲେ । କୃଷକମାନଙ୍କୁ କାରଖାନାର ମାଲିକ କରାଯିବ ।
ପ୍ରାଥମିକତା ଅନୁଯାୟୀ ତାଳଚେର-ବିମଳାଗଡ ରେଳ ଲାଇନ ୨ ବର୍ଷ ମଧ୍ୟରେ ସମ୍ପୂର୍ଣ୍ଣ ହେବ । ଯଦି ନୀତିଶ ଗଙ୍ଗଦେବ ସାଂସଦ ଭାବେ ନିର୍ବାଚିତ ହୋଇ ଆସନ୍ତି ତେବେ ସେ ଦିଲ୍ଲୀରୁ ପାଣ୍ଠି ଆଣି ଦେବଗଡ଼ର ବିକାଶ କରିବେ । ଦେବଗଡଙ୍କୁ ଏହିପରି ଅନେକ ପ୍ରତିଶ୍ରୁତି ମଧ୍ୟରେ ଓଡ଼ିଶାର ଏକ ନମ୍ବର ଜିଲ୍ଲା କରାଯିବ ବୋଲି ମଧ୍ୟ କହିଥିଲେ । ଗତକାଲି ଦଳ ସାମ୍ବାଦିକ ସମ୍ମିଳନୀରେ କେନ୍ଦ୍ର ଅବହେଳା ପ୍ରସଙ୍ଗ ଉଠାଇଥିଲା । କିନ୍ତୁ ଆଜି ଏହି ନେତାଙ୍କ ଉତ୍ତର କିମ୍ବା ସ୍ପଷ୍ଟୀକରଣ ମିଳିନାହିଁ । ୨୦୧୯ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉନଥିବାରୁ ଏହି ନେତା ୨୦୧୯ ନିବାଚନୀ ରାଲିରେ ଏହିପରି ସମସ୍ତ ବଡ ବଡ ପ୍ରତିଶ୍ରୁତି ଦେଇଥିଲେ । ବର୍ତ୍ତମାନ ମଧ୍ୟ ଏହି ନେତା ପୁନର୍ବାର ବଡ ବଡ ପ୍ରତିଜ୍ଞା କରୁଛନ୍ତି ଯାହା କେବେ ବି ସତ ହେବନାହିଁ ।
ଏହି ନେତା ଜଣଙ୍କ ଆଜି ଲୋକଙ୍କୁ ଜଣାଇବା ଉଚିତ ଯେ ସମ୍ବଲପୁର-କଟକ ରାଜପଥ କାର୍ଯ୍ୟ ଦଶନ୍ଧି ଧରି ଚାଲିଆସୁଛି । ଗତ ୯ ବର୍ଷ ମଧ୍ୟରେ ସେ ଏ ଦିଗରେ କି ପଦକ୍ଷେପ ଗ୍ରହଣ କରିଛନ୍ତି । ଏଥିରୁ ଜଣାପଡୁଛି ଯେ ଏହି ନେତାଙ୍କ ନିକଟରେ କୌଣସି ପ୍ରସଙ୍ଗ ନାହିଁ । ତେଣୁ ରାଜନୀତିରେ ତିଷ୍ଠି ରହିବା ପାଇଁ ଓଡିଶାର ମୁଖ୍ୟମନ୍ତ୍ରୀ ଏବଂ ଓଡିଶାର ଲୋକଙ୍କୁ ଅପମାନିତ କରିବାକୁ ଚେଷ୍ଟା କରୁଛନ୍ତି । ସୂଚନାଯୋଗ୍ୟ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଶନିବାର ଦେବଗଡ଼ ଗସ୍ତରେ ଯାଇଥିଲେ । ସେଠାରେ ସେ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ । ଏହାର ଜବାବରେ ରଖିଛନ୍ତି ସସ୍ମିତ ।
ଇଟିଭି ଭାରତ, ଭୁବନେଶ୍ବର
