ଆନନ୍ଦପୁର: ଘଷିପୁରା ବିଧାୟକ ଓ ଉପଜିଲ୍ଲାପାଳ ଆନନ୍ଦପୁର ଉପଖଣ୍ଡ ମେଡିକାଲରେ ଚାଲିଥିବା ଧାରଣା ସ୍ଥଳରେ ପହଞ୍ଚିଥିଲେ । ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କ ସହ ଫୋନ ଯୋଗେ ସମସ୍ୟାର ସମାଧାନ ନିମନ୍ତେ ବାର୍ତ୍ତାଳାପ ପରେ ସେଠାରେ ଚାଲିଥିବା ଧାରଣା ପ୍ରତ୍ୟାହୃତ ହୋଇଛି । ଆଜି(ଶୁକ୍ରବାର) ସକାଳୁ ମା’ ମଙ୍ଗଳା କ୍ଲବ ଘଷିପୁରା ଏବଂ ସାମ୍ବାଦିକଙ୍କ ମିଳିତ ସହଯୋଗରେ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ହେଉଥିବା ବିଭିନ୍ନ ଅବ୍ୟବସ୍ଥାର ସମାଧାନ ନିମନ୍ତେ ୫ ଦଫା ଦାବି ନେଇ ଧାରଣା ଦିଆଯାଇଥିଲା।
ଖବର ପାଇ ଘଷିପୁରା ବିଧାୟକ ବଦ୍ରିନାରାୟଣ ପାତ୍ର ଏବଂ ଆନନ୍ଦପୁର ଉପଜିଲ୍ଲାପାଳ ସରୋଜ କୁମାର ଦତ୍ତ ଧାରଣା ସ୍ଥଳରେ ପହଞ୍ଚି ଦାବି ବିଷୟରେ ଅବଗତ ହୋଇଥିଲେ । ପରେ ଜିଲ୍ଲା ମୁଖ୍ୟ ଚିକିତ୍ସାଅଧିକାରୀଙ୍କୁ ଦାବି ଗୁଡିକର ଦୃଷ୍ଟି ଆକର୍ଷଣ କରିଥିଲେ। ଫଳରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଏକ ମାସ ମଧ୍ୟରେ ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେବାରୁ ଧାରଣା ପ୍ରତ୍ୟାହୃତ ହୋଇଛି।
ଆନନ୍ଦପୁରରୁ ସ୍ମୃତି ରଞ୍ଜନ ବିହାରୀ, ଇଟିଭି ଭାରତ
