କେନ୍ଦୁଝର : ଜିଲ୍ଲାରେ ପଞ୍ଚଦଶ କଳା ଉତ୍ସବ ଆରମ୍ଭ ହୋଇଛି । ଆଗାମୀ ପିଢ଼ିର କଳାକାରଙ୍କୁ ପ୍ରୋତ୍ସାହନ ଯୋଗାଇବା ପାଇଁ ଆରମ୍ଭ ହୋଇଛି ପଞ୍ଚଦଶ କେନ୍ଦୁଝର କଳା ଉତ୍ସବ । ଜିଲ୍ଲାର ସର୍ବ ପୁରାତନ ସାଂସ୍କୃତିକ ଅନୁଷ୍ଠାନ ସାଂସ୍କୃତିକ ଆନୁକୂଲ୍ୟରେ ଏହି ଦୁଇ ଦିନିଆ କଳା ଉତ୍ସବ ଆରମ୍ଭ ହୋଇଛି । ଜିଲ୍ଲାର କଳାକାରଙ୍କ ଦ୍ଵାରା ପ୍ରସ୍ତୁତ ଚିତ୍ର, ବହି ଓ ପଥର କାରୁକାର୍ଯ୍ୟ ଆଦି ପ୍ରଦର୍ଶନୀ ହେବ । ଏହାସହ ସ୍ଥାନୀୟ ଲୋକନୃତ୍ୟ ମଧ୍ୟ ପ୍ରଦର୍ଶିତ କରାଯିବ । ଏହା ନୂତନ ପିଢ଼ି ପାଇଁ ଚିତ୍ରକଳା ପ୍ରତିଯୋଗିତା ସହ ଫଟୋଚିତ୍ର ପ୍ରଦର୍ଶନୀର ବ୍ୟବସ୍ଥା କରାଯାଇଛି ।
ଚିତ୍ରକଳା ପ୍ରତିଯୋଗିତା ସହ କ୍ୟାମେରା ଲେନ୍ସ ଷ୍ଟଲ, ପତ୍ରପତ୍ରିକା ଷ୍ଟଲ ଆଦିରେ କେନ୍ଦୁଝର ଜିଲ୍ଲାର ଛାପ ଦେଖିବାକୁ ବେଶ ମିଳିଥିଲା ।ଏହି ଦୁଇ ଦିନିଆ କଳା ଉତ୍ସବକୁ ଜିଲ୍ଲା ଆରକ୍ଷୀ ଅଧିକ୍ଷକ ମିତ୍ରଭାନୁ ମହାପାତ୍ର ଆନୁଷ୍ଠାନିକ ଭାବେ ଦ୍ୱୀପଜାଳି ଉଦଘାଟନ କରିଥିଲେ । ଏହା ପରେ ଚିତ୍ରକଳା ପ୍ରଦର୍ଶନୀ, ପତ୍ରପତ୍ରିକା ପ୍ରଦର୍ଶନୀ ଓ ଷ୍ଟଲ ବୁଲି ସେ ଦେଖିଥିଲେ ।
ସ୍ଥାନୀୟ ପୌରପାଳିକା କଲ୍ୟାଣ ମଣ୍ଡପ ଠାରେ ଅନୁଷ୍ଠିତ କଳା ଉତ୍ସବରେ ଅନେକ ଅଭିଭାବକମାନେ ଯୋଗ ଦେଇଥିଲେ । ଜିଲ୍ଲାର ବିଭିନ୍ନ ପ୍ରକାରର କଳାକାରଙ୍କ ପାଇଁ ଏଭଳି କାର୍ଯ୍ୟକ୍ରମ ନୂତନ ସମ୍ଭାବନା ଯୋଗାଇ ଦେଇଛି । ୩୫ ବର୍ଷ ତଳେ ଆରମ୍ଭ ହୋଇଥିବା ଏହି ସାଂସ୍କୃତିକ ଅନୁଷ୍ଠାନ ସ୍ଥାନୀୟ କଳାକାରଙ୍କ ପାଇଁ ସମର୍ପିତ ଥିବାବେଳେ କୋରୋନା କଟକଣା ମାନି ଏହି ପଞ୍ଚଦଶ କଳା ଉତ୍ସବ ଅନୁଷ୍ଠିତ କରୁଥିବା ଆୟୋଜକ ପ୍ରକାଶ କରିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
