ଆନନ୍ଦପୁର: ରବିବାର ଗଞ୍ଜାମ ଜିଲ୍ଲାରେ 11କେଭି ବିଦ୍ୟୁତ ତାର ଲାଗି 10 ଜଣଙ୍କ ମୃତ୍ୟୁ ହୋଇଛି । ମାତ୍ର ଏଭଳି ପରିସ୍ଥିତି କେବଳ ଗଞ୍ଜାମରେ ନୁହେଁ ବରଂ ରାଜ୍ୟର ବିଭିନ୍ନ ସ୍ଥାନରେ ସମାନ ସ୍ଥିତି । କେଉଁଠି ବିଦ୍ୟୁତ ତାର ଝୁଲିରହିଛି ତ' କେଉଁଠି ଖୁଣ୍ଟି ଉପୁଡି ଗଲାଣି । କେନ୍ଦୁଝର ଜିଲ୍ଲା ଘସିପୁରା ବ୍ଲକ କେଶଦୁରାପାଳ ଗାଁରେ ଦେଖିବାକୁ ମିଳିଛି ସମାନ ପରିସ୍ଥିତି ।
ଘର ଦେଇ ଯାଇଛି ହାଇଭୋଲଟେଜ୍ ତାର ପୁଣି ଖୁଣ୍ଟି ମଧ୍ୟ ନଇଁ ଗଲାଣି । ଅନ୍ୟପକ୍ଷେ ଗୋଟିଏ ବିଦ୍ୟୁତ ଖୁଣ୍ଟିରେ ଛନ୍ଦି ହୋଇ ରହିଛି ଅନେକ ତାର । ଅନେକ ଥର ଗାଁ ଲୋକେ ତାର ଲାଗି ଆହତ ମଧ୍ୟ ହୋଇଛନ୍ତି । କିନ୍ତୁ ବିଭାଗୀୟ ଅଧିକାରୀଙ୍କୁ ବାରମ୍ବାର କହିବା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ଏସମ୍ପର୍କରେ ଆନନ୍ଦପୁର ନେସ୍କୋ ୟୁଟିଲିଟି ନିର୍ବାହୀ ଯନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲା ମାତ୍ର ସେ 80 ପ୍ରତିଶତ ସମସ୍ୟାର ସମାଧାନ ହୋଇଥିବା ବେଳେ ଯଥାଶୀଘ୍ର ବାକି ସମସ୍ୟାର ସମାଧାନ ହେବ ବୋଲି କହିଛନ୍ତି ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
