ଆନନ୍ଦପୁର: ଘର ଭିତରୁ ଯୁବତୀଙ୍କ ଝୁଲନ୍ତା ମୃତଦେହ ଉଦ୍ଧାର । ଏଭଳି ଅଭାବନୀୟ ଘଟଣା କେନ୍ଦୁଝର ଜିଲ୍ଲା ଆନନ୍ଦପୁର ଥାନା ପଣ୍ଡୁଆ ଗାଁରେ ଘଟିଛି । ତେବେ ମୃତ ଯୁବତୀ ଜଣକ ହେଲେ ଆନନ୍ଦପୁର ପୌରାଞ୍ଚଳର ବିନୋଦ ଦାସଙ୍କ ଝିଅ ସ୍ନେହଲତା ।
ସୂଚନା ଅନୁସାରେ, ସ୍ନେହଲତାଙ୍କ ପଣ୍ଡୁଆ ଗାଁର ଜଣେ ଯୁବକଙ୍କ ସହ ପ୍ରେମ ସମ୍ପର୍କ ଥିଲା । ଦେଢମାସ ପୂର୍ବରୁ ନିଜ ଘରକୁ ସ୍ନେହଲତାଙ୍କୁ ନେଇଯାଇଥିଲେ ସଂପୃକ୍ତ ଯୁବକ । ହେଲେ ଏ ପର୍ଯ୍ୟନ୍ତ ଉଭୟଙ୍କ ବିବାହ ହୋଇନଥିଲା । ସ୍ନେହଲତାଙ୍କ ଆଖିକୁ ସମ୍ପୂର୍ଣ୍ଣ ଭାବେ ଦେଖାଯାଏ ନାହିଁ ।
ଗତ କିଛିଦିନ ହେବ ଯୁବକ ଜଣଙ୍କ କାମରେ ବାହାରକୁ ଯାଇଥିବାବେଳେ ସ୍ନେହଲତା ଘରେ ସଂପୃକ୍ତ ଯୁବକଙ୍କ ବାପା ଏବଂ ମାଙ୍କ ସହ ରହୁଥିଲେ । ଶନିବାର ରାତିରେ ଖାଇସାରିବା ପରେ ଘରର ସମସ୍ତେ ଶୋଇଯାଇଥିଲେ । ହେଲେ ସକାଳୁ କବାଟ ନଖୋଲିବାରୁ ପରିବାର ଲୋକେ କବାଟ ଭାଙ୍ଗି ସ୍ନେହଲତାଙ୍କ ଝୁଲନ୍ତା ମୃତଦେହ ଦେଖିବାକୁ ପାଇଥିଲେ ।
ତେବେ ବିବାହ କରାଇବାରେ ପୁଅ ଘର ଲୋକେ ଡେରି କରିବାରୁ ସ୍ନେହଲତା ମାନସିକ ଭାରସାମ୍ୟ ହରାଇ ଆତ୍ମହତ୍ୟା କରିଥିବା ତାଙ୍କ ମା’ ଶକୁନ୍ତଳା ଅଭିଯୋଗ କରିଛନ୍ତି । ଆନନ୍ଦପୁର ପୋଲିସ ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
