କେନ୍ଦ୍ରାପଡା: ବିଜେଡି ସାଂସଦ ପ୍ରାର୍ଥୀଙ୍କର ମିଶ୍ରଣ ପର୍ବ ଓ କର୍ମୀ ସମ୍ମିଳନୀରେ ଭାଙ୍ଗିଲା ସଭାମଞ୍ଚ। ରବିବାର ଅପରାହ୍ଣରେ ଏଭଳି ଏକ ଘଟଣା ଦେଖିବାକୁ ମିଳିଥିଲା କେନ୍ଦ୍ରାପଡ଼ା ସଂସଦୀୟ କ୍ଷେତ୍ର ଆଳି ନିର୍ବାଚନ ମଣ୍ଡଳୀରେ।
ଖବର ମୁତାବକ ରବିବାର ପୂର୍ବାହ୍ନରେ କେନ୍ଦ୍ରାପଡ଼ା ବିଜେଡି ଲୋକସଭା ସାଂସଦ ପ୍ରାର୍ଥୀ ଅନୁଭବ ମହାନ୍ତି ଓ ଆଳି ବିଜେଡି ବିଧାୟକ ପ୍ରାର୍ଥୀ ପ୍ରତାପ ଚନ୍ଦ୍ର ଦେବ ଆଳିର ପ୍ରସିଦ୍ଧ ଠାକୁର ବଳଦେବ ଜୀଉଙ୍କ ନିକଟରୁ ଆଶୀର୍ବାଦ ନେଇ ଜୁଆଣିଆ ପଞ୍ଚାୟତରେ ଅନୁଷ୍ଠିତ ହେଉଥିବା କର୍ମୀ ସମ୍ମିଳନୀ ଓ ମିଶ୍ରଣ ପର୍ବରେ ଯୋଗଦେଇଥିଲେ ।
ସଭାମଞ୍ଚରେ ସମସ୍ତ ନିର୍ଦ୍ଧାରିତ କାର୍ଯ୍ୟ ସୂଚାରୁ ରୂପେ ଚାଲୁଥିଲା । କିନ୍ତୁ ଓଲିଉଡ ଷ୍ଟାରଙ୍କୁ ପାଖରେ ପାଇ ସେଲ୍ଫି ନେବାପାଇଁ ମଞ୍ଚ ଉପରକୁ କିଛି କର୍ମୀ ଚଢ଼ିଆସିବାରୁ ମଞ୍ଚଟି ଟଳମଳ ହୋଇ ଭାଙ୍ଗିଯିବା ପରିସ୍ଥିତିରେ ରହିଥିଲା।
ଫଳରେ ମଞ୍ଚରେ ଥିବା ସାଂସଦ ପ୍ରାର୍ଥୀ ଓ ବିଧାୟକ ପ୍ରାର୍ଥୀଙ୍କ ସମେତ ଅନେକ ନେତୃମଣ୍ଡଳୀ ଅଳ୍ପକେ ମଞ୍ଚରୁ ଓହ୍ଲାଇ ଆସି ବଞ୍ଚିଯାଇଥିଲେ । କର୍ମୀ ମାନଙ୍କର ଅଧିକ ଫଟୋ ମାନିଆ ଓ ସେଲ୍ଫି ନିଶା ଏହି ଘଟଣା ପାଇଁ ମୁଖ୍ୟତଃ ଦାୟୀ ବୋଲି ସୂଚନା ମିଳିଛି।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
