କେନ୍ଦ୍ରାପଡା: ଶେଷରେ ବହୁଚର୍ଚ୍ଚିତ କେନ୍ଦ୍ରାପଡା କୋ-ଅପରେଟିଭ ସୋସାଇଟି ସଭାପତି ପ୍ରମୋଦ କୁମାର ସାହୁଙ୍କୁ ବାନ୍ଧିଲା ପୋଲିସ। ଦୀର୍ଘଦିନ ଧରି ଆଇନ ଓ ପୋଲିସର ନ୍ୟାୟିକ ବ୍ୟବସ୍ଥାରୁ ବଞ୍ଚିଯାଇଥିବା ବେଳେ, ତାଙ୍କୁ ରବିବାର ମଧ୍ୟରାତ୍ରିରେ ଗିରଫ କରିଛି ପୋଲିସ।
ସୋସାଇଟି ସଭାପତିଙ୍କ ଏହି ଘୃଣ୍ୟ କାର୍ଯ୍ୟକୁ ପ୍ରଥମେ ETV BHARAT ଗତ ସୋମବାର ଦିନ ପ୍ରସାରିତ ହୋଇଥିଲା। ଏହା ପରେ ବିଭିନ୍ନ ରାଜନୈତିକ ଏବଂ ସମାଜସେବୀ ସଙ୍ଗଠନ ଓ କେନ୍ଦ୍ରାପଡ଼ା ବାସିନ୍ଦା ନ୍ୟାୟ ପାଇଁ ପୀଡିତାକୁ ହାତ ବଢ଼ାଇଥିଲେ।
କର୍ମକ୍ଷେତ୍ରରେ ଜଣେ ଯୁବତୀଙ୍କୁ ଅସଦାଚରଣ କରିବା ସହ ମୋବାଇଲ ଶିଖିବା ବାହାନାରେ ବାରମ୍ବାର ରାତି ଅଧରେ ମେସେଞ୍ଜର ଯୋଗେ କଲ କରିବା, ବଳପୂର୍ବକ ଶାରୀରିକ ସମ୍ପର୍କ ସ୍ଥାପନ କରିବା ପାଇଁ ବାଧ୍ୟ କରିବା ପରେ ଅମଙ୍ଗ ହେବାରୁ ଜୀବନରୁ ମାରିଦେବାକୁ ଧମକ ଦେବା ଅଭିଯୋଗରେ କୋର୍ଟ ଚାଲାଣ ହୋଇଛନ୍ତି ପ୍ରମୋଦ କୁମାର ସାହୁ।
ଗତକାଲି ମଧ୍ୟରାତ୍ରିରେ ଟାଉନ ପୋଲିସ ପ୍ରମୋଦ ସାହୁକୁ ସହରର ବଣିଆମାଳ ସ୍ଥିତ ବାସଭବନରୁ ଗିରଫ କରିବା ପରେ ଆଜି ସକାଳ ୪ଘଟିକା ସମୟରେ ମେଡ଼ିକାଲ ଚିକିତ୍ସା ପାଇଁ ନିଆଯାଇଥିଲା। ପରେ ମଧ୍ୟାହ୍ନରେ ତାକୁ କୋର୍ଟରେ ହାଜର କରାଇବା ସମୟରେ ପରିସ୍ଥିତିକୁ ଦୃଷ୍ଟିରେ ରଖି ପୋଲିସ ପକ୍ଷରୁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା।
ପୋଲିସ ପ୍ରମୋଦ ସାହୁକୁ ପ୍ରମାଣ ଆଧାରରେ 354(A),354(B),506,509,294 IPCରେ ଗିରଫ କରି କୋର୍ଟ ଚାଲାଣ କରାଯାଇଥିବା ଅତିରିକ୍ତ ଏସପି ଗାଗାରିନ ମହାନ୍ତି ସୂଚନା ଦେଇଛନ୍ତି।
ସେହିପରି ଉକ୍ତ ଦଫା ଗୁଡିକ ସାତ ବର୍ଷ ସମୟରୁ କମ ସମୟର ଦଫା ହୋଇଥିବାରୁ ମାନ୍ୟବର ଉଚ୍ଚତମ ନ୍ୟାୟାଳୟଙ୍କ ନିର୍ଦ୍ଦେଶାନୁସାରେ ପୋଲିସ ଜାମିନ କରିବା କଥା। ହେଲେ ପୋଲିସ ଅଭିଯୁକ୍ତ ପ୍ରମୋଦ ସାହୁକୁ ଜାମିନ ଦେଇନଥିବାରୁ, ଏସଡିଜେଏମ କୋର୍ଟରେ ଜାମିନ ଆବେଦନ କରାଯାଇଛି ବୋଲି ତାଙ୍କ ଓକିଲ ସୂଚନା ଦେଇଛନ୍ତି।
ଗତ ଏପ୍ରିଲ ମାସରୁ ପୀଡିତା ଜଣଙ୍କ ଥାନାରେ ଲିଖିତ ଏତଲା ଦେଇଥିଲେ ମଧ୍ୟ ପୋଲିସ ପୀଡିତାଙ୍କ କୌଣସି ଅଭିଯୋଗକୁ କର୍ଣ୍ଣପାତ କରୁନଥିଲା। ହେଲେ ଏସଡିଜେଏମ କୋର୍ଟରେ ପୀଡିତା ପ୍ରମୋଦ ସାହୁଙ୍କ ବିରୁଦ୍ଧରେ ଗତ ଜୁଲାଇ ମାସରେ ଏକ କେସ କରିବା ପରେ ପୋଲିସ ତଦନ୍ତ ଆରମ୍ଭ କରିଛି।
ତେବେ ପୋଲିସ ଟେକନିକାଲ କାରଣ ଦର୍ଶାଇ ଘଟଣାଠାରୁ ଦୂରେଇ ରହୁଥିବା ଓ ଅଭିଯୁକ୍ତକୁ ଘଣ୍ଟ ଘୋଡାଉଥିବା ଘଟଣା ETV BHARATରେ ପ୍ରକାଶିତ ହେବାପରେ ପୋଲିସ ବାଧ୍ୟହୋଇ ତଦନ୍ତକୁ କ୍ରିୟାଶୀଳ କରିବା ସହ ଓ ଅଭିଯୁକ୍ତକୁ ଗତକାଲି ଗିରଫ କରିଛି।
ତେବେ ଅଭିଯୁକ୍ତକୁ ଦଣ୍ଡ ଦେବାରେ ଗଣମାଧ୍ୟମର ଭୂମିକାକୁ ପୀଡିତା ଧନ୍ୟବାଦ ଦେବାସହ, ପୋଲିସର କାର୍ଯ୍ୟକଳାପ ଯାହା, ବର୍ତ୍ତମାନ ସେ ନ୍ୟାୟ ପାଇବାକୁ ଆଶାବାଦୀ ବୋଲି କହିଛନ୍ତି ସେ। ଅପରପକ୍ଷରେ ତାଙ୍କ ଜୀବନ ପ୍ରତି ବିପଦ ଥିବାରୁ ଦୁଇଜଣ ମହିଳା କନେଷ୍ଟବଳ ସମେତ ଜଣେ ପୁରୁଷ କନେଷ୍ଟବଳଙ୍କୁ ତାଙ୍କ ଘର ଆଗରେ ମୁତୟନ କରାଯାଇଛି। ପ୍ରମୋଦ ସାହୁ ଗିରଫ ପରେ ଅନ୍ୟତମ ଅଭିଯୁକ୍ତ କମଳାକାନ୍ତ ସୁଆରକୁ ପୋଲିସ ଖୋଜୁଛି।
ତେବେ ମୁଖ୍ୟ ଅଭିଯୁକ୍ତ ପ୍ରମୋଦ ସାହୁ ଗିରଫ ହୋଇଥିଲେ ମଧ୍ୟ ଏଭଳି କାର୍ଯ୍ୟର ମାଷ୍ଟରମାଇଣ୍ଡ କୁହାଯାଉଥିବା କେନ୍ଦ୍ରାପଡା କ୍ରେଡିଟ କୋ-ଅପରେଟିଭ ସୋସାଇଟିର ଇନସ୍ୟୁରାନ୍ସ ଆଡଭାଇଜର କମଳାକାନ୍ତ ସୁଆର ତଥା ପୀଡିତାର ମାମୁଁଙ୍କୁ ପୋଲିସ କେବେ ଗିରଫ କରୁଛି ତାହା ସମୟ କହିବ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
