କେନ୍ଦ୍ରାପଡା: ରାଜ୍ୟରେ ଲଘୁଚାପ ଜନିତ ଲଗାଣ ବର୍ଷା ଫଳରେ ମହାନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । କେନ୍ଦ୍ରାପଡ଼ା ଜିଲ୍ଲାର ମାର୍ଶାଘାଇ, ମହାକାଳପଡା ଓ ଗରଦପୁର ବ୍ଲକରେ ପ୍ରବାହିତ ହେଉଥିବା ଲୁଣା ଓ ଚିତ୍ରୋତ୍ପଳା ନଦୀ ବିପଦ ସଙ୍କେତ ଉପରେ ପ୍ରବାହିତ ହେଉଛି । ଫଳରେ ମାର୍ଶାଘାଇ ବ୍ଲକର ଲୁଣା ଏବଂ ଚିତ୍ରୋତ୍ପଳା ନଦୀରେ ବନ୍ୟା ଆସି ୧୮ଟି ପଞ୍ଚାୟତର ୬୦ଟି ଗ୍ରାମ ପ୍ରଭାବିତ ହୋଇଥିବା ଜିଲ୍ଲା ପ୍ରଶାସନ ପକ୍ଷରୁ ସୂଚନା ମିଳିଛି ।
ତେବେ ବନ୍ୟା ପ୍ରଭାବରେ ୭୦ ହଜାର ୨୩୧ ଲୋକ ପ୍ରଭାବିତ ହୋଇଛନ୍ତି । ସେହିପରି ୬ଟି ଆଶ୍ରୟସ୍ଥଳରେ ୫ ଶହରୁ ଊର୍ଦ୍ଧ୍ବ ଲୋକଙ୍କୁ ଥଇଥାନ କରାଯାଇଥିବା ଜଣାପଡିଛି । ସେହିପରି ପାଣିର ସ୍ତର ଦେଖି ଆବଶ୍ୟକ ପଡ଼ିଲେ ଆହୁରି ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବାର ଯୋଜନା ରହିଛି । ଅନ୍ୟପଟେ ସ୍ଥାନାନ୍ତରିତ ଲୋକମାନଙ୍କୁ ତିନି ଦିନ ମାଗଣା ଖାଦ୍ୟ ଦେବାକୁ ନିଷ୍ପତ୍ତି ନିଆଯାଇଥିବା ସୂଚନା ଦେଇଛି ଜିଲ୍ଲା ପ୍ରଶାସନ । ମହାନଦୀରେ ମଧ୍ୟମ ଧରଣର ବନ୍ୟା ଆସିବ ବୋଲି ଗୁରୁବାର ସ୍ବତନ୍ତ୍ର ରିଲିଫ୍ କମିସନ୍ କେନ୍ଦ୍ରାପଡ଼ା ଜିଲ୍ଲାକୁ ସତର୍କ କରାଇ ଦେଇଥିଲେ । ଫଳରେ ଗରଦପୁର,ମାର୍ଶାଘାଇ,ମହାକାଳପଡ଼ା ବ୍ଲକ୍ ସମେତ ଡେରାବିଶ ବ୍ଲକର ଆଂଶିକ ଅଞ୍ଚଳ ବନ୍ୟାରେ ପ୍ରଭାବିତ ଆଶଙ୍କା ଉପୁଜିଥିଲା । ତେଣୁ ଗତ ଗୁରୁବାର ଯୁଦ୍ଧକାଳୀନ ଭିତ୍ତିରେ ଉପଜିଲ୍ଲାପାଳଙ୍କ ଅଧ୍ୟକ୍ଷତାରେ ମାର୍ଶାଘାଇ ବ୍ଲକ୍ କାର୍ଯ୍ୟାଳୟରେ ବନ୍ୟା ମୁକାବିଲା ବୈଠକ ବସିଥିଲା ।
ଏହା ମଧ୍ୟ ପଢନ୍ତୁ- ଜଳମୟ ଜଗତସିଂହପୁର, ୧୪ ଗାଁ ପ୍ରଭାବିତ
ଜିଲ୍ଲା ଜରୁରୀକାଳୀନ ବିଭାଗର ସୂଚନା ମୁତାବକ, ଗତ ଗୁରୁବାର ରାତିରେ ପାଣି ଆସିବା ଯୋଗୁଁ ଗାଁରେ ପାଣି ପଶିବା ଆରମ୍ଭ କରିଛି । ସେହିପରି ଗତକାଲି ସୁଦ୍ଧା ଗରଦପୁର ଓ ମାର୍ଶାଘାଇର ୬ଟି ବାତ୍ୟା ଆଶ୍ରୟସ୍ଥଳରେ ୫୫୭ ଲୋକଙ୍କୁ ଥଇଥାନ କରାଯାଇଛି । ୮ଟି ଭୋଜନ କେନ୍ଦ୍ର ଖୋଲାଯିବା ସହ ବିପନ୍ନଙ୍କୁ ୩ ଦିନ ମାଗଣା ଖାଦ୍ୟ ଦିଆଯିବ ବୋଲି ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଛି । ବାତ୍ୟା ଆଶ୍ରୟସ୍ଥଳରେ ରହିଥିବା ଲୋକଙ୍କ ପାଇଁ ୪୬ କ୍ବିଣ୍ଟାଲ ଚୁଡା, ୪.୮୦ କ୍ବିଣ୍ଟାଲ ଗୁଡ ପଠାଯିବା ସହ ୨ଟି ଆଶ୍ରୟ ସ୍ଥଳକୁ ୧୬୦ କାର୍ଟୁନ ବିସ୍କୁଟ, ୫ଶହ ବୋତଲ ପାଣି ଏବଂ ୩ ହଜାର ପାଉଣ୍ଡ ପାଣି ପ୍ୟାକେଟ ପଠାଯାଇଛି । ଏଥିସହ ବିପନ୍ନଙ୍କ ପାଇଁ ୩ଟି ମେଡିକାଲ ଟିମ୍ ଏବଂ ୬ଟି ପଶୁଚିକିତ୍ସା ଦଳ ଗଠନ ହୋଇଛି । ଅନ୍ୟପକ୍ଷରେ ବନ୍ୟା ଦାଉରୁ ଗୃହପାଳିତ ପଶୁ ବି ବାଦ୍ ପଡ଼ିନାହାନ୍ତି । ୪୧ଟି ଗାଈ ଓ ବଳଦ ଏବଂ ୯୦ଟି ବାଛୁରୀ ପ୍ରଭାବିତ ହୋଇଥିବା ସୂଚନା ମିଳିଛି ।
ଇଟିଭି ଭାରତ, କେନ୍ଦ୍ରାପଡା
