କେନ୍ଦ୍ରାପଡା: ରାତି ପାହିଲେ ଆରମ୍ଭ ହୋଇଯିବ 4ର୍ଥ ତଥା ଓଡିଶାର ଶେଷ ପର୍ଯ୍ୟାୟ ନିର୍ବାଚନ । ଏଥିଲାଗି ଚଳଚଞ୍ଚଳ ଜିଲ୍ଲା ପ୍ରଶାସନ । ସେପଟେ କେନ୍ଦ୍ରାପଡ଼ା ନିର୍ବାଚନ ପାଇଁ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ଶନିବାରଠାରୁ ସମସ୍ତ ବୁଥରେ ଇଭିଏମ ପଠାଯାଇଥିବା ବେଳେ ଜିଲ୍ଲାପାଳ ଦାଶରଥି ଶତପଥୀ କେନ୍ଦ୍ରାପଡ଼ା ସ୍ବୟଂ ଶାସିତ ମହାବିଦ୍ୟାଳୟରେ ଉପସ୍ଥିତ ରହି ସମସ୍ତ ନିର୍ବାଚନୀ କାର୍ଯ୍ୟର ତଦାରଖ କରୁଛନ୍ତି ।
କେନ୍ଦ୍ରାପଡାରେ ଜିଲ୍ଲାରେ 1438ଟି ବୁଥ ଥିବାବେଳେ ଆଦର୍ଶ ବୁଥ ସଂଖ୍ୟା ରହିଛି 35 । ସେହିପରି ଗତ ମାର୍ଚ୍ଚ 10ରେ ପ୍ରକାଶିତ ସମ୍ଭାବ୍ୟ ତାଲିକା ଅନୁଯାୟୀ 143ଟି ସମ୍ବେଦନଶୀଳ ବୁଥ ରହିଛି । ତେବେ 4ର୍ଥ ପର୍ଯ୍ୟାୟ ମତଦାନ ପାଇଁ ସମ୍ବେଦନଶୀଳ ବୁଥର ସଠିକ ସଂଖ୍ୟା ନିର୍ବାଚନ ସମୟରେ ଜଣାପଡିବ ବୋଲି କହିଛନ୍ତି ଜିଲ୍ଲାପାଳ ।
ମତଦାନ ହେଉଛି ସମସ୍ତ ନାଗରିକଙ୍କ କର୍ତ୍ତବ୍ୟ ଓ ଅଧିକାର । ତେଣୁ ଚଳିତ ନିର୍ବାଚନରେ ଜିଲ୍ଲାରେ ଅଧିକରୁ ଅଧିକ ମତଦାନ ପାଇଁ ଇଟିଭି ଭାରତ ମାଧ୍ୟମରେ ଜିଲ୍ଲାବାସୀଙ୍କୁ ନିବେଦନ କରିଛନ୍ତି କେନ୍ଦ୍ରାପଡ଼ା ଜିଲାପାଳ ଦାଶରଥି ଶତପଥୀ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
