ଫୁଲବାଣୀ: ପରୀକ୍ଷାରେ ଛାତ୍ରଛାତ୍ରୀଙ୍କ ଆତ୍ମବିଶ୍ବାସ ବଢାଇବା ସହ ଚାପମୁକ୍ତ କରିବାକୁ ଆରମ୍ଭ ହୋଇଛି ସ୍ବତନ୍ତ୍ର ଅଭିଯାନ । ପରୀକ୍ଷା ସମୟରେ ଏବଂ ପର ମୂହର୍ତ୍ତରେ ଛାତ୍ରଛାତ୍ରୀମାନେ ଚାପଗ୍ରସ୍ଥ ହୋଇ ଆତ୍ମହତ୍ୟା କରୁଥିବାରୁ ଆୟୋଜନ କରାଯାଉଛି ପରୀକ୍ଷା ପର୍ବ । ଏହି ସୂଚନା ଦେଇଛନ୍ତି ରାଜ୍ୟ ଶିଶୁ ଅଧିକାର ସୁରକ୍ଷା କମିଶନ। ଶନିବାର କନ୍ଧମାଳ ଜିଲ୍ଳା ଗସ୍ତ କରିବା ସମୟରେ ବିଭିନ୍ନ ବିଷୟରେ ଆଲୋଚନା କରି ଏଭଳି ସୂଚନା ଦେଇଛନ୍ତି ଆୟୋଗ ଅଧ୍ୟକ୍ଷା ସଂନ୍ଧ୍ୟାବତୀ ପ୍ରଧାନ ।
ଏହାସହ ଆସନ୍ତା 2025 ମସିହା ମଧ୍ୟରେ ରାଜ୍ୟକୁ ଶିଶୁ ଶ୍ରମିକ ମୁକ୍ତ କରାଯିବ ବୋଲି ମଧ୍ୟ ସେ କହିଛନ୍ତି। ରାଜ୍ୟର ବିଭିନ୍ନ ସ୍ଥାନରେ ପରୀକ୍ଷା ପର୍ବ ଆୟୋଜନ କରାଯାଇ ସଚେତନ କରାଯିବ। ଏପରିକି କିଛି ଦ୍ଵନ୍ଦ ଥିଲେ ପରୀକ୍ଷାର୍ଥୀ ଓ ଅଭିଭାବକମାନେ ଅନଲାଇନରେ ଅନେକ ମନସ୍ତତ୍ତ୍ବବିତଙ୍କ ସହ କଥା ହୋଇ ନିଜ ଦ୍ବନ୍ଦ ଦୂର କରିପାରିବେ ବୋଲି ଆୟୋଗ ତରଫରୁ ସୂଚନା ଦିଆଯାଇ ଛି। ଫେବ୍ରୁଆରୀରେ ମାଟ୍ରିକ ଓ ମାର୍ଚ୍ଚରେ ଯୁକ୍ତ ଦୁଇ ପରୀକ୍ଷାକୁ ଦୃଷ୍ଟିରେ ରଖି ଏପରି ପଦକ୍ଷେପ ଗ୍ରହଣ କରାଯାଇଛି।
ଏହି ଗସ୍ତରେ କମିଶନ ସଦସ୍ୟ ମନ୍ଦାକିନୀ କର, ହରିହର ବେହେରା ମଧ୍ୟ ସାମିଲ ହୋଇଥିଲେ। ଆଲୋଚନା ଓ ବୈଠକରେ ଫୁଲବାଣୀ ଉପଜିଲ୍ଲାପାଳ ସୁରେଶ ଚନ୍ଦ୍ର ପ୍ରଧାନ,ସିଡବ୍ଲୁସି,ଡିସିପିୟୁ ସହିତ ସ୍କୁଲ ଓ କଲେଜ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।
କନ୍ଧମାଳରୁ ସଦାଶିଵ ପାତ୍ର, ଇଟିଭି ଭାରତ ।
