ଭବାନୀପାଟଣା: ପ୍ରେମ ବିଫଳ ହେବାରୁ ନାବାଳିକାକୁ ଅପହରଣ ଘଟଣାରେ ଯୁବକକୁ ଗିରଫ କରିଛି ପୋଲିସ । ସୂଚନା ଅନୁଯାୟୀ, କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ଥାନା ଅଞ୍ଚଳରେ ଜଣେ ବାଳିକାକୁ ବାଣୀପଙ୍ଗା ଗାଁର ମଧୁ ମାଝୀ ଏକ ତରଫା ପ୍ରେମ କରିଆସୁଥିଲେ । ଏନେଇ ସେ ବାରମ୍ବାର ପ୍ରେମ ନିବେଦନ ମଧ୍ୟ କରିଥିଲେ ହେଲେ, ନାବାଳିକା ଜଣକ କୌଣସି ଉତ୍ତର ନରଖି ଯୁବକଙ୍କୁ ଅଣଦେଖା କରିଆସୁଥିଲେ । ଏହାକୁ ନେଇ ଅଭିଯୁକ୍ତ ମଧୁ ମାଝୀ ନାବାଳିକାକୁ ଅପହରଣ କରିବା ପାଇଁ ଯୋଜନା ପ୍ରସ୍ତୁତ କରିଥିଲେ ।
ଗତ ୮ ତାରିଖ ସନ୍ଧ୍ୟାରେ ନାବାଳିକା ଜଣକ ଗାଁ ଶେଷମୁଣ୍ଡରେ ଥିବା ପୋଖରୀକୁ ଯାଉଥିବା ସମୟରେ ଅଭିଯୁକ୍ତ ମଧୁ ମାଝୀ ନାବାଳିକାଙ୍କୁ ଅପହରଣ କରି କେରଳର ଏର୍ଣ୍ଣାକୂଳମ ନେଇଯାଇଥିଲେ । ପରେ ନାବାଳିକାଙ୍କ ପରିବାର ଲୋକେ ଅନେକ ଖୋଜାଖୋଜି ପରେ ନପାଇବାରୁ ଶେଷରେ ପରିବାର ଲୋକେ ଲାଞ୍ଜିଗଡ଼ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ତଦନ୍ତ ଆରମ୍ଭ କରିଥିଲା ପୋଲିସ । ଶେଷରେ ଅଭିଯୁକ୍ତ ଜଣକ ନାବାଳିକାକୁ ନେଇ କେରଳରେ ରଖିଥିବା ଖବର ପାଇ ପୋଲିସ ଏକ ସ୍ବତନ୍ତ୍ର ଟିମ ପ୍ରସ୍ତୁତ କରି ଅଭିଯୁକ୍ତ ନାବାଳିକା ଲୁଚାଇ ରଖିଥିବା ଘରେ ଚଢ଼ାଉ କରି ନାବାଳିକାକୁ ଉଦ୍ଧାର କରିଥିବା ବେଳେ ଅଭିଯୁକ୍ତକୁ ଗିରଫ କରିଛି । ପରେ ପୋଲିସ ଅଭିଯୁକ୍ତକୁ ଥାନାକୁ ଆଣି ଅଧିକ ପଚରାଉଚରା ପରେ କୋର୍ଟ ଚାଲାଣ କରିଥିବା ଜଣାପଡ଼ିଛି ।
ଇଟିଭି ଭାରତ, କଳାହାଣ୍ଡି
