ଭବାନୀପାଟଣା: ରାଜ୍ୟରେ କଳାହାଣ୍ଡି ଜିଲ୍ଲା ଧାନ ଉତ୍ପାଦନରେ ଦ୍ବିତୀୟ । ଚଳିତ ବର୍ଷ ବର୍ଷାଭାବ ଯୋଗୁଁ ଜିଲ୍ଲାରେ ବ୍ୟାପକ ଧାନ ଫସଲ ନଷ୍ଟ ହୋଇଛି । ହେଲେ ଯାହା ବି କିଛି ଅମଳ ହୋଇଛି ତାହାର ବିକ୍ରୟ ଚିନ୍ତା ଏବେ ଘାରିଛି ଚାଷୀଙ୍କୁ । କାରଣ ଧାନ କ୍ରୟ ପାଇଁ ପ୍ରଶାସନ ମଣ୍ଡି ବ୍ୟବସ୍ଥା କରିଥିବାବେଳେ ତାହା ଏ ଯାଏଁ କାର୍ଯ୍ୟକାରୀ ହୋଇପାରି ନାହିଁ । ତେଣୁ ବର୍ତ୍ତମାନ ମଣ୍ଡି ଅପେକ୍ଷାରେ କଳାହାଣ୍ଡି ଚାଷୀ ।
ଜିଲ୍ଲାର ଜଳସେଚିତ ଓ ଅଣଜଳସେଚିତ ଅଞ୍ଚଳରେ ଧାନ ଅମଳ ଶେଷ ପର୍ଯ୍ୟାୟରେ । ବିଶେଷକରି ଜୟପାଟଣା, ଧର୍ମଗଡ, ଜୁନାଗଡ ଓ ଭବାନୀପାଟଣା ବ୍ଲକରେ ଚାଷୀ ଧାନ ଅମଳ କରି ଖଳାରେ ରଖିଛି । ମୋଟ ଚାଷର ପ୍ରାୟ ୬୦ ଭାଗ ଆମଳ ହୋଇସାରିଥିଲେ ହେଁ ଜିଲ୍ଲାରେ ସରକାରୀ ଦରରେ ଧାନ ସଂଗ୍ରହ ହୋଇପାରି ନାହିଁ । ଫଳରେ କ୍ଷୁଦ୍ର ଚାଷୀ ଶୋଷଣର ଶିକାର ହେଉଥିବାର ଅଭିଯୋଗ ଆସିଛି । ସେପଟେ ମଣ୍ଡି ସମସ୍ୟା ଦଲାଲଙ୍କ ପାଇଁ କ୍ବିଣ୍ଟାଲ ପ୍ରତି ୮୫୦ ରୁ ୯୦୦ ଟଙ୍କାରେ ଧାନ କିଣିବା ପାଇଁ ସୁଯୋଗ ସୃଷ୍ଟି କରିଛି । ବିଳମ୍ବରେ ମଣ୍ଡି ଖୋଲିବା ଯୋଗୁଁ ମୁଣ୍ଡ ଝାଳ ତୁଣ୍ଡରେ ମାରି ଧାନ ଅମଳ କରିଥିବା ଚାଷୀ ଶୋଷଣର ଶିକାର ପାଲଟୁଛନ୍ତି ।
