ଭବାନୀପାଟଣା : କଳାହାଣ୍ଡି ମହୋତ୍ସବ ଘୁମୁରାର ରୌପ୍ୟ ଜୟନ୍ତୀ ସମାରୋହ ଉଦ୍ଯାପିତ ହୋଇଯାଇଛି । ଜିଲ୍ଲାପାଳ ପି.ଅନ୍ଵେଷା ରେଡ୍ଡୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଦ୍ଯାପନୀ ସନ୍ଧ୍ୟାରେ ମୁଖ୍ୟଅତିଥି ଭାବେ ରାଜ୍ୟସଭା ସାଂସଦ ସୁଜିତ କୁମାର ଯୋଗଦେଇ କଳାହାଣ୍ଡି ମାଟିର ମହିମା ବର୍ଣ୍ଣନା କରିଥିଲେ । ଆଜି ସେ ଯାହା ବି ହୋଇଛନ୍ତି ଏ ଗାଁ ମାଟି ପାଇଁ ବୋଲି କହିଛନ୍ତି । କଳାହାଣ୍ଡିର ୧୩ଟି ବ୍ଲକର ବିକାଶ, ପ୍ରତ୍ୟେକ ପରିବାର ପାଖକୁ ମୌଳିକ ସୁବିଧା ନପହଞ୍ଚିବା ଯାଏଁ ଅବିରତ ପ୍ରୟାସ ଜାରି ରଖିବେ ବୋଲି କହିଥିଲେ ।
ସେହିପରି ସମ୍ମାନିତ ଅତିଥି ଭାବେ ଜୁନାଗଡ଼ ବିଧାୟକ ଦିବ୍ୟଶଙ୍କର ମିଶ୍ର ଯୋଗଦେଇ କହିଛନ୍ତି, କଳାହାଣ୍ଡି ଆଜି ଏକ ବିକାଶିତ ଜିଲ୍ଲା ଭାବେ ନାମ କରିଛି । ଏହି ବିକାଶ କଳାହାଣ୍ଡି ଗାଁ ମାଟିର ଆଶୀର୍ବାଦ ରହିଛି । ଏହି ଅବସରରେ ବିଭିନ୍ନ କ୍ଷେତ୍ରରେ କୃତିତ୍ୱ ହାସଲ କରି ମାଟିକୁ ଗର୍ବିତ କରିଥିବା ୫ଜଣ ଭାରତ ଭୂଷଣ ଦେଓ, ମୂରଲୀଧର ମହାରଣା, ହେମନ୍ତ ମୁଣ୍ଡ, ବିରଞ୍ଚି ପଣ୍ଡା, ରଥୀ ନାଗଙ୍କୁ କଳାହାଣ୍ଡି ବରପୁତ୍ର ସମ୍ମାନରେ ସମ୍ମାନିତ କରାଯାଇଥିଲା ।
ସେହିଭଳି ୫ ଜଣ କୃତୀ ଛାତ୍ରଛାତ୍ରୀଙ୍କୁ ଜ୍ଞାନଶ୍ରୀ ପୁରସ୍କାର ଓ ଜଣେ ନିରପେକ୍ଷ, ନିଷ୍ଠାପର ଓ ଆଦିବାସୀଙ୍କ ପାଇଁ ସମାଜ ପାଇଁ ନିଜ ଜୀବନକୁ ଉସ୍ବର୍ଗୀକୃତ କରିଥିବା ଯୁବ ସାମ୍ବାଦିକ ସ୍ବର୍ଗତଃ ମହମ୍ମଦ ଅସଲମ, ସ୍ବର୍ଗତଃ ଭାନୁ ପ୍ରକାଶ ରଥ, ବରିଷ୍ଠ ସାମ୍ବାଦିକ ସ୍ବର୍ଗତଃ ସଞ୍ଜୀବ ଯୋଶୀଙ୍କୁ ମରଣୋତ୍ତର କଳାହାଣ୍ଡି ସମ୍ମାନ ପ୍ରଦାନ କରାଯାଇଥିଲା । ସ୍ବେଚ୍ଛାସେବୀ ମନୋଜ ପଟ୍ଟନାୟକଙ୍କୁ ମଧ୍ୟ ସମ୍ମାନିତ କରାଯାଇଥିଲା।