ଝାରସୁଗୁଡା: ଆଗକୁ ୨୦୨୪ ସାଧାରଣ ନିର୍ବାଚନ । ଏବେଠୁ ରାଜନୈତିକ ଦଳମାନଙ୍କ ଆରମ୍ଭ ହୋଇଗଲାଣି ପ୍ରସ୍ତୁତି । ଭୋଟରଙ୍କୁ ଆକୃଷ୍ଟ କରିବା ପାଇଁ ଏବେଠୁ ମାତିଲେଣି ନେତା । ଏହି କ୍ରମରେ ଶାସକ ଦଳ ବିଜେଡି ବି ଅଣ୍ଟା ଭିଡ଼ିବା ଆରମ୍ଭ କରିଛି । ଏଥର ବିଜେଡି ଟାର୍ଗେଟରେ ଯୁବ ଭୋଟର ! ଯୁବ ଭୋଟରଙ୍କୁ ହାତମୁଠାକୁ ନେବା ପାଇଁ ଦଳ ବର୍ତ୍ତମାନ ନୂଆ ଷ୍ଟ୍ରାଟେଜି ଆପଣାଇଛି । ଦଳ ଶିକ୍ଷା ଓ କ୍ରୀଡ଼ା କୁ ପ୍ରାଧାନ୍ୟ ଦେଇ ଭୋଟରଙ୍କୁ ଆକର୍ଷିତ କରିବା ପାଇଁ ପଦକ୍ଷେପ ଗ୍ରହଣ କରିଛି ।
ଝାରସୁଗୁଡା ସହର ସ୍ଥିତ ନବ ଦାସ ଅଡିଟୋରିୟମଠାରେ ଆମ ଓଡ଼ିଶା ଅନ୍ତର୍ଗତ 'ମୁଁ ବି ହେବି ନବୀନ ଓଡ଼ିଶାର ସାରଥି' କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ରାଜ୍ୟରେ ନବୀନ ପଟ୍ଟନାୟକଙ୍କ ନେତୃତ୍ବରେ ଯେଉଁଭଳି ଭାବେ ଓଡିଶା ଆଗେଇ ଚାଲିଛି ସେନେଇ ଆଲୋଚନା ହୋଇଥିଲା । ଜିଲ୍ଲାର ଯୁବଗୋଷ୍ଠୀମାନଙ୍କୁ ସୋସିଆଲ ମିଡ଼ିଆରେ ବିଜୁ ଜନତା ଦଳର ଜନହିତକାରୀ କାର୍ଯ୍ୟ ପ୍ରସାର ପ୍ରଚାର କରିବା ସହ ବିକାଶ ପାଇଁ ଦଳ କଣ ସବୁ ପଦକ୍ଷେପ ଗ୍ରହଣ କରୁଛି ତାହା ଜନସାଧାରଣ ମାନଙ୍କୁ ଜଣାଇବା ପାଇଁ ପରାମର୍ଶ ଦେଇଥିଲେ ।
ଏହା ସହିତ ବିଜୁ ଜନତା ଦଳ ଶିକ୍ଷା ଓ କ୍ରୀଡ଼ା ପ୍ରତି ନେଉଥିବା ପଦକ୍ଷେପ ସବୁ ଜନତାଙ୍କ ପାଖକୁ ପହଞ୍ଚାଇ ଦଳ ସହିତ ଲୋକଙ୍କୁ ଏବଂ ଯୁବ ସମାଜକୁ ଯୋଡ଼ିବା ପାଇଁ ଆହ୍ବାନ ଦିଆଯାଇଛି । ଆସନ୍ତା ୨୦୨୪ରେ ପୂନର୍ବାର ବିଜୁ ଜନତା ଦଳକୁ ବିଜୟ କରି ନବୀନ ପଟ୍ଟନାୟକଙ୍କୁ ଆଉଥରେ ମୁଖ୍ୟମନ୍ତ୍ରୀ କରି ଓଡ଼ିଶାର ବିକାଶକୁ ଆଗେଇ ନେବା ପାଇଁ ସହଯୋଗ କରିବାକୁ କହିଥିଲେ କାର୍ଯ୍ୟକ୍ରମରେ ଯୋଗ ଦେଇଥିବା ଦଳର ବରିଷ୍ଠ ନେତାମାନେ ।
ଏହି କାର୍ଯ୍ୟକ୍ରମରେ ଝାରସୁଗୁଡ଼ା ବିଧାୟିକା ଦୀପାଳୀ ଦାସ, ବ୍ରଜରାଜନଗର ବିଧାୟିକା ଅଳକା ମହାନ୍ତି, ବିଜେଡି ଜିଲ୍ଲା ସଭାପତି ରବି ସିଂ, ରାଜ୍ୟ ବିଜୁ ଯୁବ ବାହିନୀ ସଭାପତି ସମେତ ବହୁ ରାଜ୍ୟସ୍ତରୀୟ ବିଜେଡି ନେତା ଓ ଜିଲ୍ଲାସ୍ତରୀୟ ନେତା ଯୋଗ ଦେଇଥିଲେ ।
ଏହା ମଧ୍ୟ ପଢନ୍ତୁ.. ଜାରି ରହିବ ମହାନଦୀକୁ ନେଇ ନ୍ୟାୟିକ ଲଢେଇ: ବିଜେଡି
ଏହି ଅବସରରେ ଝାରସୁଗୁଡା ବିଧାୟିକା ଦୀପାଳି ଦାସ କହିଛନ୍ତି,"ମୁଖ୍ୟମନ୍ତ୍ରୀଙ୍କ ବିକାଶମୂଳକ କାର୍ଯ୍ୟ ଲୋକମାନଙ୍କ ନିକଟରେ ପହଞ୍ଚାଇବା ଆମମାନଙ୍କ କାମ ଅଟେ । 'ମୁଁ ହେବି ନବୀନ ଓଡ଼ିଶାର ସାରଥୀ' ଲୋକମାନଙ୍କ ମଧ୍ୟରେ ବିକାଶର ସାଥି ହେବାକୁ ବାର୍ତ୍ତା ଦେଉଛି ।"
ଇଟିଭି ଭାରତ, ଝାରସୁଗୁଡ଼ା
