ଝାରସୁଗୁଡ଼ା: ବ୍ରଜରାଜନଗର ବିଧାୟକ ତଥା ପୂର୍ବତନ ବାଚସ୍ପତି କିଶୋର ମହାନ୍ତିଙ୍କ ଅନ୍ତିମ ସଂସ୍କାର ଆଜି ଅପରାହ୍ନରେ ହେବ(Demised MLA Kishor Mohanty Cremation Ceremony) । କିଶୋରଙ୍କ ପାର୍ଥିବ ଶରୀରକୁ ଵିଜୁ ଜନତା ଦଳ କାର୍ଯ୍ୟାଳୟରେ ସର୍ବସାଧାରଣଙ୍କ ଶେଷ ଦର୍ଶନ ପାଇଁ ନିଆଯାଇଛି ।
ଆଜି ସକାଳ ପ୍ରାୟ ୯ଟା ସମୟରେ ବ୍ରଜରାଜନଗର ବିଧାୟକ କିଶୋର ମହାନ୍ତିଙ୍କ ପାର୍ଥିବ ଶରୀରକୁ ମଙ୍ଗଳ ବଜାର ସ୍ଥିତ ବାସଭବନରୁ ଗାନ୍ଧୀଛକ ସ୍ଥିତ ଵିଜୁ ଜନତା ଦଳ କାର୍ଯ୍ୟାଳୟରେ ରଖାଯାଇଥିଲା । ସାଧାରଣ ଜନତାଙ୍କ ଶେଷ ଦର୍ଶନ ପାଇଁ କିଛି ସମୟ ରଖାଯିବା ପରେ ମଙ୍ଗଳବଜାର ସ୍ଥିତ ଅଡିଟୋରିୟମ କମ ସ୍ପୋର୍ଟସ କମ୍ପ୍ଲେକ୍ସ ଠାରେ ମଧ୍ୟ ସର୍ବସାଧାରଣଙ୍କ ଶେଷ ଦର୍ଶନ ପାଇଁ ରଖାଯିବ ।
କିଶୋର ମହାନ୍ତିଙ୍କ ଅନ୍ତିମ ସଂସ୍କାର ଆଜି ପ୍ରାୟ ୩ଟା ବେଳେ ଝାରସୁଗୁଡ଼ାରେ ହେବ ବୋଲି ସୂଚନା ମିଳିଛି । ଝାଡ଼େଶ୍ବର ମନ୍ଦିର ସ୍ଥିତ ମୁକ୍ତିଧାମ ଠାରେ ତାଙ୍କର ପାର୍ଥିବ ଶରୀରର ଶେଷକୃତ୍ୟ ସମ୍ପର୍ଣ୍ଣ କରାଯିବ । ସୂଚନା ଯୋଗ୍ୟ, ଗୁରୁବାର ସନ୍ଧ୍ୟାରେ କିଶୋର ମହାନ୍ତିଙ୍କ ପରଲୋକ ଘଟିଛି । ୬୩ ବର୍ଷ ବୟସରେ ହୃଦଘାତରେ ତାଙ୍କର ମୃତ୍ୟୁ ଘଟିଛି ।
ଝାରସୁଗୁଡ଼ାରୁ ଗୁରୁଚରଣ ବାଘ, ଇଟିଭି ଭାରତ
