ଯାଜପୁର: ଖାଉଟିଙ୍କୁ କନ୍ଦାଉଛି ପରିବା ଦର। ପ୍ରଥମେ ପିଆଜ ଓ ଏବେ ରୋଷେଇଶାଳରୁ ଗାଏବ ହେବାରେ ଲାଗିଛି ସବୁଜ ପନିପରିବା । କାରଣ ଗତ କିଛି ଦିନଧରି ଯାଜପୁର ଜିଲ୍ଲାର ବିଭିନ୍ନ ବଜାର ଓ ହାଟରେ ପରିବା ଦର ଆକାଶ ଛୁଆଁ ହୋଇଛି । ଫଳରେ ଖାଉଟି ଏବେ ପରିବା କିଣିବାକୁ ମୁଁହ ଫେରାଉଛନ୍ତି ।
କିଛିଦିନ ତଳେ ସେଞ୍ଚୁରୀ ମାରିଥିଲା ପିଆଜ। ଏବେ କିନ୍ତୁ ଲୋକଙ୍କ ଚିନ୍ତା ବଢାଇ ଦେଇଛି ସବୁଜ ପନିପରିବା । ବିଶେଷ କରି ଜିଲ୍ଲାର ପ୍ରମୁଖ ସହର ବ୍ୟାସନଗର, କଳିଙ୍ଗନଗର, ଯାଜପୁର ଟାଉନ ଆଉ ବାରବାଟୀ ବଜାର ଆଦି ସ୍ଥାନରେ ଦେଖିବାକୁ ମିଳୁଛି ପରିବାରେ ଚଢା ଦର ।
ତେବେ ଜାଣନ୍ତୁ ପରିବା ଦର:
- ବିନସ୍ ୫0
- ଫୁଲକୋବି ଗୋଟା ୩୦
- ବାଇଗଣ କିଲୋ ୪0
- କଲରା ୭0
- ପୋଟଳ ୮୦
- ଟମାଟୋ 30
- ଭେଣ୍ଡି ୫୦
ଯାହା ଫଳରେ ପରିବା କିଣିବା ଆଗରୁ 10 ଥର ଭାବୁଛନ୍ତି ଖାଉଟି। ସାଧାରଣତଃ ଶୀତ ଦିନରେ ପରିବା ଅଧିକ ଚାଷ ହେଉଥିବାରୁ ପରିବା ଦର କମ ହେବା କଥା । ମାତ୍ର ବାତ୍ୟା, ଅଦିନିଆ ବର୍ଷା ଆଉ ଜିଲ୍ଲାରେ ଶୀତଳ ଭଣ୍ଡାର ଅଭାବ ଯୋଗୁଁ ପରିବା ଦର ଏବେ ଆକାଶ ଛୁଆଁ । ଯେଉଁଠି 100ଟଙ୍କାରେ ବ୍ୟାଗଭର୍ତ୍ତି ପରିବା ମିଳୁଥିଲା ଏବେ ୫୦୦ ଟଙ୍କାରେ ତା ହେଉନାହିଁ । ତେବେ ପରିବା ଚାଷୀଙ୍କ ପ୍ରତି ଥିବା ସରକାରଙ୍କ ଅବହେଳା ଯୋଗୁଁ ପରିବା ଦର ହୁ ହୁ ହୋଇ ବଢୁଥିବା ଅଭିଯୋଗ ହୋଇଛି।
ଦିନକୁ ଦିନ ବଢୁଥିବା ପରିବା ଦର ପ୍ରତି ସରକାର ଦୃଷ୍ଟିଦେଇ ଯଦି ଯଥାଶୀଘ୍ର ପରିବା ଦର ନିୟନ୍ତ୍ରଣ ନ କରନ୍ତି, ଆଗାମୀ ଦିନରେ ଲୋକଙ୍କ ଥାଳିରୁ ପରିବା ଉଭାନ ହୋଇଯିବ ଏଥିରେ ସନ୍ଦେହ ନାହିଁ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
