ବ୍ରହ୍ମପୁର: ଆଲୋଡା ହେଲା ବୃଦ୍ଧବୃଦ୍ଧା । ଚିକିତ୍ସା ବାହାନାରେ ମେଡିକାଲ ଆଣି ଛାଡି ଚାଲି ଯାଇଛନ୍ତି ପରିବାର ଲୋକେ । ମେଡିକାଲର ବେଡରେ ରୋଗୀ ଭଳି ଦିନ କାଟୁଛନ୍ତି ଅସହାୟ ବୃଦ୍ଧବୃଦ୍ଧା । ଏମିତି ଘଟଣା ଦେଖିବାକୁ ମିଳିଛି ବ୍ରହ୍ମପୁରର ଏମ୍.କେ.ସି.ଜି ମେଡିକାଲରେ । ପ୍ରାୟ ୧୦ ରୁ ୧୨ ଜଣ ବୃଦ୍ଧବଦ୍ଧାଙ୍କ ବାସ ପାଲଟିଛି ଏମକେସିଜି ମେଡିକାଲ ।
ସ୍ବେଚ୍ଛାସେବୀ କହିଛନ୍ତି, ‘‘ଚିକିତ୍ସା ବାହାନାରେ ଆଣି ଏମାନଙ୍କୁ ଏମ୍.କେ.ସି.ଜି ମେଡିକାଲରେ ଛାଡି ଚାଲିଯାଇଛନ୍ତି ସେମାନଙ୍କ ପରିବାର ବର୍ଗ । କିଏ ଅସ୍ଥିଶଲ୍ୟ ବିଭାଗରେ ଚିକିତ୍ସିତ ହେଉଥିଲା ତ ଆଉ କିଏ ଭେଷଜ । ଅନ୍ୟାନ୍ୟ ଅନ୍ତଃବିଭାଗରେ ବହୁଦିନ ଧରି ଚିକିତ୍ସା ଶେଷ ପରେ ମଧ୍ଯ ପରିବାର ବର୍ଗ ସେମାନଙ୍କୁ ନେବା ପାଇଁ ଅସି ନଥିଲେ । ସେମାନଙ୍କ ଦେଖାଶୁଣା ପାଇଁ ମେଡିକାଲ କର୍ତ୍ତୁପକ୍ଷ ସ୍ବତନ୍ତ୍ର ଭାବରେ ଆମକୁ ନିୟୋଜିତ କରିଛନ୍ତି। ପରିବାର ସଦସ୍ୟଙ୍କ ପରି ଆମେ ତାଙ୍କର ଯତ୍ନ ନେଉଛୁ । ଏହାରି ଭିତରେ ୬ ଜଣଙ୍କ ମୃତ୍ୟୁ ଘଟିଥିବା ବେଳେ ୧୦ ଜଣ ଅସହାୟଙ୍କ ସେବା ଜାରି ରହିଛନ୍ତି ।’’
ଦିନ ଥିଲା ଏମାନେ ଜଣେ ଜଣେ ସମାଜରେ ଭଲ ନାଗରିକ ଭାବରେ ନିଜର ପରିବାର । ବନ୍ଧୁ ପରିଜନଙ୍କ ସହିତ ବେଶ ହସଖୁସିରେ ଜୀବନ ବିତାଉଥିଲେ । ହେଲେ ଆଜି ଏମାନଙ୍କ ପାଖରେ କିଏ ନାହିଁ କହିଲେ କିଛି ଅତ୍ଯୁକ୍ତି ହେବ ନାହିଁ । ପରିଣତ ବୟସରେ ଏକ ପ୍ରକାର ଅସହାୟ । କାହାର ପୁଅ, ବୋହୂ ଅଛନ୍ତି ତ ଆଉ କାହାର ଝିଅ, ଜ୍ବାଇଁ, ନାତି, ନାତୁଣୀ, ବନ୍ଧୁ ପରିଜନ ରହିଛନ୍ତି । ସେମାନଙ୍କ ଏହି ବୟସରେ ସ୍ନେହ, ଶ୍ରଦ୍ଧା, ସମ୍ମାନ ପାଇବା ପରିବର୍ତ୍ତେ ଏମାନଙ୍କୁ କରାଯାଇଛି ହତାଦର । ବିନା ସାହାରାରେ ଏମାନେ ଚାଲିବାକୁ ଅକ୍ଷମ । କେବଳ ଭାଗ୍ୟକୁ ଆଦରି ନିଜର ମନର କୋହକୁ ଚାପି ରଖି ମେଡିକାଲର ଶର୍ଯ୍ୟାରେ ଅବଶିଷ୍ଟ ଜୀବନ ବିତାଇବାକୁ ଚାଲିଛି ଏମାନଙ୍କ ସଂଙ୍ଘର୍ଷ ।
