ବ୍ରହ୍ମପୁର: ଆସନ୍ତା ଡିସେମ୍ବର ୨୪ରୁ ୨୮ ତାରିଖ ପର୍ଯ୍ୟନ୍ତ ପାଞ୍ଚଦିନ ବ୍ୟାପି ଗୋପାଳପୁରରେ ଆୟୋଜିତ ହେବାକୁ ଯାଉଛି ବେଳାଭୂମି ମହୋତ୍ସବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ମହୋତ୍ସବକୁ ଉଦଘାଟନ କରିବାର କାର୍ଯ୍ୟକ୍ରମ ରହିଛି । ମୁଖ୍ୟତଃ ସ୍ଥାନୀୟ ଲୋକକଳା ଓ ସଙ୍ଗୀତକୁ ପ୍ରୋତ୍ସାହନ ଦିଆଯିବା ସହ ପ୍ରତ୍ୟେକ ଦିନ ଓଲିଉଡ ଓ ବଲିଉଡ କଳାକାରମାନଙ୍କ ଦ୍ବାରା ମନୋରଞ୍ଜନ କାର୍ଯ୍ୟକ୍ରମ କରାଯିବ । ପ୍ରସିଦ୍ଧ ବଲିଉଡ କଣ୍ଠଶିଳ୍ପୀ ସୋନୁ ନିଗମ ଉଦଘାଟନୀ ଉତ୍ସବରେ ଯୋଗ ଦେବାକୁ ଥିବାବେଳେ ଦ୍ବିତୀୟ ଦିନରେ ବଲିଉଡ଼ର ହାସ୍ୟ ଅଭିନେତା ସଙ୍କିତ ଭୋସଲେ, ଉଦଯାପନୀ ସଂନ୍ଧ୍ୟାରେ ପ୍ରସିଦ୍ଧ କଣ୍ଠ ଶିଳ୍ପୀ ସାନ୍ ଯୋଗ ଦେବାର କାର୍ଯ୍ୟକ୍ରମ ରହିଛି ।
ଚଳିତବର୍ଷ ମହୋତ୍ସବକୁ ଅଧିକ ଆକର୍ଷଣୀୟ କରିବା ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ଏପରିକି ବେଳାଭୂମି ମହୋତ୍ସବ କମିଟିର କର୍ମକର୍ତ୍ତାମାନେ ମହୋତ୍ସବ ଷ୍ଟଲ ଠାରୁ ଆରମ୍ଭ କରି ସମସ୍ତ ପ୍ରକାର ବ୍ୟବସ୍ଥାକୁ ଅନୁଧ୍ୟାନ କରିଛନ୍ତି । ମୁଖ୍ୟତଃ ଗୋପାଳପୁର ବେଳାଭୂମି ମହୋତ୍ସବକୁ ଆନ୍ତର୍ଜାତୀୟ ସ୍ତରର ମହୋତ୍ସବ ଭାବରେ ମାନ୍ୟତା ପ୍ରଦାନ କରିବାକୁ ଗତ କିଛି ବର୍ଷ ଧରି ଉଦ୍ୟମ କରାଯାଉଛି ।
ଚଳିତ ଥର ମହୋତ୍ସବରେ ମହିଳା ଓ ବରିଷ୍ଠ ନାଗରିକଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି । ସେହିଭଳି ମହୋତ୍ସବରେ ଜନସାଧାରଣଙ୍କ ପାଇଁ ପଲ୍ଲୀଶ୍ରୀ ମେଳା, ହର୍ବାଲ ମେଳା, ଖାଦ୍ୟ ମେଳା ସହ ସରକାରଙ୍କ ବିଭିନ୍ନ କାର୍ଯ୍ୟକ୍ରମକୁ ଏଥିରେ ପ୍ରଚାର ପ୍ରସାର କରାଯିବ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
