ଗଜପତି: ପାରଳାଖେମୁଣ୍ଡି ରେଳ ଷ୍ଟେସନଠାରେ ଥିବା ଏକ ପାସେଞ୍ଜର ଟ୍ରେନରେ ଅଗ୍ନିକାଣ୍ଡ । ଅଗ୍ନିକାଣ୍ଡରେ ଜଣେ ନାବାଳକର ମୃତ୍ୟୁ ଘଟିଛି । ନାବାଳକ ଜଣକ ପାରଳାଖେମୁଣ୍ଡିର ଗୌର ଚନ୍ଦ୍ର ସାହୀର ସୂର୍ଯ୍ୟ କୁମାର ବୋଲି ଜଣାପଡିଛି । ସେ ନବମ ଶ୍ରେଣୀର ଛାତ୍ର ଥିଲେ । ସୂଚନା ଅନୁସାରେ କୋରୋନା ସ୍ପେଶାଲ୍ ଟ୍ରେନଟି ବହୁ ଦିନ ହେଲା ପାରଳାଖେମୁଣ୍ଡି ଷ୍ଟେସନରେ ଅଟକି ରହିଥିଲା ।
ବୁଧବାର ସନ୍ଧ୍ୟାବେଳେ ସୂର୍ଯ୍ୟ କୁମାର ନିଜର କିଛି ବନ୍ଧୁଙ୍କ ସହ ସେଠାକୁ ବୁଲିବାକୁ ଆସି ଟ୍ରେନ ବଗି ଉପରକୁ ଚଢ଼ି ସେଲ୍ଫି ନେଉଥିଲେ । ସେଲଫି ନେବାବେଳେ ବିଦ୍ୟୁତ ତାର ସଂସ୍ପର୍ଶରେ ଆସିଯାଇଥିଲେ ସୂର୍ଯ୍ୟ । ଫଳରେ ସେହି ବଗି ଉପରେ ହିଁ ସୂର୍ଯ୍ୟ ଜଳିଯିବା ସହ ଜଳିଗଲା ଟ୍ରେନ । ସେପଟେ ସୂର୍ଯ୍ୟଙ୍କ ସାଙ୍ଗରେ ଆସିଥିବା ଜଣେ ଯୁବକ ଘଟଣାସ୍ଥଳରୁ ଫେରାର ହୋଇଥିବାବେଳେ ଅନ୍ୟ କିଛି ଯୁବକଙ୍କୁ ଅଟକ ରଖାଯାଇଛି । ସେହିପରି ଟ୍ରେନରେ ନିଆଁ ଲାଗିବା ଦେଖି ତୁରନ୍ତ ରେଳବାଇ କର୍ମଚାରୀ ଅଗ୍ନିଶମ ବିଭାଗକୁ ଡାକି ନିଆଁକୁ ଆୟତ୍ତ କରାଯାଇଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
