ଢେଙ୍କାନାଳ: ଆସନ୍ତାକାଲି ଠାରୁ ଆରମ୍ଭ ହେବ ବିଶ୍ବ ପ୍ରସିଦ୍ଧ ଯୋରନ୍ଦା ମେଳା । ଫଳରେ ମହିମା ଧର୍ମର ମୁଖ୍ୟ ପୀଠ ଢେଙ୍କାନାଳର ଯୋରନ୍ଦା ସ୍ଥିତ ମହିମା ଗାଦିର ମହିମା ସାଧୁ ମାନେ ତାଙ୍କର ଏହି ବାର୍ଷିକ ଉତ୍ସବ ପାଇଁ ବେଶ ପ୍ରସ୍ତୁତି ଚଳାଇଛନ୍ତି । ମାତ୍ର କୋଭିଡ ସଂକ୍ରମଣକୁ ଆଶଙ୍କା କରି ଚଳିତ ବର୍ଷ ମଧ୍ୟ ଜିଲ୍ଲା ପ୍ରଶାସନ ପକ୍ଷରୁ ମେଳା ଉପରେ କଟକଣା ଜାରି କରାଯାଇଛି । ଏପରିକି ଜିଲ୍ଲା ଓ ରାଜ୍ୟ ବାହାର ଭକ୍ତଙ୍କୁ ଯୋରନ୍ଦା ବାରଣ କରାଯାଇଛି। ଫଳରେ ମହିମା ସାଧୁ କେବଳ ନୀତିକାନ୍ତିରେ ତାଙ୍କର ଏହି ବାର୍ଷିକ ପର୍ବକୁ ସୀମିତ ରଖିବେ ବୋଲି ଜଣାପଡିଛି ।
ମହିମା ଧର୍ମର ପରମ୍ପରା ମୁତାବକ ଏହି ମେଳା ମାଘ ଶୁକ୍ଳ ଚତୁର୍ଦ୍ଦଶୀ ଅର୍ଥାତ, ମଙ୍ଗଳବାର ପ୍ରଭୁ ପୂର୍ଣ୍ଣିମା ଓ ବୁଧବାର ଗୁରୁ ପୂର୍ଣ୍ଣିମା ଏପରି ଦୁଇଦିନ ବ୍ୟାପି ବେଶ ଧୂମଧାମରେ ପାଳିତ ହୁଏ । ମହିମା ସନ୍ୟାସୀଙ୍କ ଏହି ୧୪୯ ତମ ବାର୍ଷିକ ଉତ୍ସବ ଅବସରରେ ସାରା ବିଶ୍ବର ମହିମା ସାଧୁ ସନ୍ୟାସୀ ଓ ଶ୍ରଦ୍ଧାଳୁ ମାନେ ତାଙ୍କର ଏହି ମୁଖ୍ୟ ପୀଠ ମହିମଗାଦିରେ ଲକ୍ଷ ଲକ୍ଷ ସଂଖ୍ୟାରେ ଯୋଗ ଦିଅନ୍ତି । ଫଳରେ ସ୍ଥାନୀୟ ଲୋକେ ଏହି ମେଳାକୁ ୭ ଦିନ ବ୍ୟାପି ବେଶ ଧୁମ ଧାମରେ ପାଳନ୍ତି ।
ମାତ୍ର କୋଭିଡ ସଂକ୍ରମଣ ଆଶଙ୍କାରେ ପୁଣି ଚଳିତ ବର୍ଷ ମେଳା ଉପରେ କଟକଣା ଜାରି କରିଛି ଜିଲ୍ଲା ପ୍ରଶାସନ । ଫଳରେ ପୀଠର ମହିମା ସାଧୁ ମାନେ କିପରି ତାଙ୍କର ନୀତିକାନ୍ତି ମୁତାବକ ପରମ୍ପରା ପାଳିବେ ସେଥିପାଇଁ ପ୍ରସ୍ତୁତି କରୁଛନ୍ତି ବୋଲି ପ୍ରକାଶ କରିଛନ୍ତି । ବାହାର ଦୋକାନ-ବଜାର ବାରଣ ଥିବାରୁ ପ୍ରସ୍ତୁତି ସମ୍ପୂର୍ଣ୍ଣ ଫିକା ଲାଗୁଛି । କେବଳ ପରମ୍ପରା ମୁତାବକ ପୀଠର ମୁଖ୍ୟ ଶୂନ୍ୟ ମନ୍ଦିର, ଗାଦି ମନ୍ଦିର, ଅଖଣ୍ଡବତୀ ମନ୍ଦିର ଆଦି ଅଞ୍ଚଳ ସଫାସୁତରା କରି ନୂଆ ରଙ୍ଗ ଦିଆଯାଇ ପ୍ରସ୍ତୁତି କରାଯାଇଛି ।
ତେବେ ମହିମା ପରମ୍ପରା ମୁତାବକ ବିଭିନ୍ନ ପ୍ରାନ୍ତରୁ ମହିମା ସାଧୁମାନେ ମହିମଗାଦି ଆଗମନ କରିଛନ୍ତି । ଏହି ବର୍ଦ୍ଧିକ ଉତ୍ସବ ପାଇଁ ପୂର୍ବରୁ ପ୍ରଶାସନ ସହ ମିଳିତ ବୈଠକ ମୁତାବକ ନିଜ ନିଜ ମଠରେ ଭକ୍ତମାନଙ୍କୁ ନେଇ ପ୍ରସ୍ତୁତି ଚଳାଇଥିବା ପ୍ରକାଶ କରିଛନ୍ତି । ଏସବୁ ମଧ୍ୟରେ ମହିମା ଧର୍ମର ପରମ୍ପରା ମୁତାବକ ମଙ୍ଗଳବାର ପ୍ରଭୁ ପୂର୍ଣ୍ଣିମା ପାଇଁ ଭୋର ସମୟରୁ ମହିମା ଗାଦିର ଶୂନ୍ୟ ମନ୍ଦିର ଓ ମୁଖ୍ୟ ଗାଦି ମନ୍ଦିରରେ ପବିତ୍ର ଜଳ ଛିଞ୍ଚନ, ଚାମର ବ୍ୟଞ୍ଜନ ଆଦି ନୀତିକାନ୍ତି ଆରମ୍ଭ କରିବେ । ପରେ ମହିମା ସନ୍ୟାସୀ ମାନେ ସମ୍ମୀଳିତ ଜଣାଣ ଓ ପ୍ରଭୁ ଶୂନ୍ୟଦେହୀଙ୍କ ଉଦ୍ଦେଶ୍ୟରେ ମୁଖ୍ୟ ଗାଦି ବି ମନ୍ଦିର ପରିସରରେ ବିଶ୍ବର ଶାନ୍ତି ଓ କଲ୍ୟାଣ ଉଦ୍ଧେଶ୍ୟରେ ଅଖଣ୍ଡ ଧ୍ବନି ଜଳାଇବେ ।
ସନ୍ଧ୍ୟାରେ ଗାଦିଦି ମନ୍ଦିର ଚାରି ଦ୍ବାରରେ ଅଖଣ୍ଡବତୀ ପ୍ରଜ୍ବଳିତ କରିବେ ବରିଷ୍ଠ ମହିମା ସନ୍ୟାସୀ । ଗୁରୁବାର ପରମ୍ପରା ମୁତାବକ ମହିମା ସନ୍ୟାସୀମାନେ ପ୍ରଭୁ ଅଲେଖ ମହିମାଙ୍କ ଶରଣଗାମୀ ପୂର୍ବକ ସମବେତ ହୋଇ ଗୁରୁପୂର୍ଣ୍ଣିମା ପାଳନ କରିବେ। ଏହି ବିଶ୍ବପ୍ରସିଦ୍ଧ ଯୋରନ୍ଦା ମେଳା କେବଳ ନୀତିକାନ୍ତିରେ ସୀମିତ ରହିବ । ଫଳରେ ଚଳିତ ବର୍ଷ ମଧ୍ୟ ଏହି ମେଳାର ମହୋଲ ଫିକା ରହିବ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
