ଢେଙ୍କାନାଳ: ମୃତ୍ୟୁ ଏମିତି ବି ଆସେ । ଦାଦାଙ୍କ ମୃତଦେହ ଦାହ କରି ମଶାଣୀରୁ ଫେରିବାବେଳେ ଦୁର୍ଘଟଣାର ଶିକାର ହୋଇ ପୁତୁରାର ମୃତ୍ୟୁ ଘଟିଛି । ଏପରି ଅଭାବନୀୟ ଘଟଣା ଘଟିଛି ଢେଙ୍କାନାଳ ଜିଲ୍ଲା ତୁମୁସିଂହା ଥାନା ଅନ୍ତର୍ଗତ କନ୍ତିଓ କାଟେଣୀ ଗ୍ରାମରେ । ଗୋଟିଏ ଦିନରେ ଦାଦା ପୁତୁରାଙ୍କ ଏପରି ଅକାଳ ବିୟୋଗରେ ପରିବାର ସହ ଗ୍ରାମବାସୀ ମର୍ମାହତ ହୋଇପଡିଥିବାବେଳେ ଗାଁ ରେ ଶୋକାକୁଳ ପରିବେଶ ସୃଷ୍ଟି କରିଛି ।
ସୂଚନା ମୁତାବକ, ଦୁର୍ଘଟଣାରେ ମୃତକ ଜଣଙ୍କ କନ୍ତିଓକାଟେଣି ଗ୍ରାମର ଲମ୍ବୋଦର ସାହୁ । ମୃତ ଲମ୍ବୋଦରଙ୍କ ଦାଦା ଗୁଣ୍ଡିଚା ସାହୁଙ୍କର ଆଜି ହୃଦଘାତରେ ମୃତ୍ୟୁ ହୋଇଥିଲା । ମଶାଣିରେ ତାଙ୍କର ଅନ୍ତିମ ସଂସ୍କାର ପରେ ଲମ୍ବୋଦର ତାଙ୍କର ସ୍କୁଟି ଯୋଗେ ଘରକୁ ଫେରୁଥିଲେ । ତେବେ ବାଟରେ ଅସାବଧାନତାବଶତଃ ସ୍କୁଟିରୁ ଖସିପଡିଥିଲେ ବୋଲି ତାଙ୍କର ସମ୍ପର୍କୀୟ ପ୍ରକାଶ କରିଛନ୍ତି । ଗୁରୁତର ଅବସ୍ଥାରେ ତାଙ୍କୁ ଚିକିତ୍ସା ପାଇଁ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ମାତ୍ର ବାଟରେ ତାଙ୍କର ମୃତ୍ୟୁ ଘଟିଥିବା ଜଣାପଡିଛି ।
