ଢେଙ୍କାନାଳ: ଶ୍ବଶୁର ଘର ପଛ ପଟୁ ଜ୍ୱାଇଁର ମୃତଦେହ ଠାବ । ଏକ ଗଛରେ ବେକରେ ରଶି ଲଗାଇ ଝୁଲନ୍ତା ଅବସ୍ଥାରେ ଯୁବକର ମୃତଦେହ ଉଦ୍ଧାର କଲା ପୋଲିସ । ଢେଙ୍କାନାଳ ଜିଲ୍ଲା ଗଁନ୍ଦିଆ ଥାନା ଅନ୍ତର୍ଗତ ରାଇତୈଳା ଗ୍ରାମରେ ଏପରି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ।
ଖବର ପାଇ ଗଁନ୍ଦିଆ ପୋଲିସ ଏହି ଗ୍ରାମର ଅର୍ଜୁନ ଜେନାଙ୍କ ଘର ବାଡିପଟୁ ଏକ ଗଛରେ ଝୁଲନ୍ତା ଅବସ୍ଥାରେ ମୃତଦେହକୁ ଉଦ୍ଧାର କରି ତଦନ୍ତ ଆରମ୍ଭ କରିଛି । ମୃତ ଯୁବକ ଜଣଙ୍କ ଯାଜପୁର ଜିଲ୍ଲା ସୁକିନ୍ଦା ଥାନା ଅନ୍ତର୍ଗତ ହାତା ଗ୍ରାମର ସନ୍ତୋଷ ବେଉରା ବୋଲି ଜଣାପଡିଛି । ମୃତ୍ୟୁର ସଠିକ କାରଣ ଜଣା ପଡ଼ିନାହିଁ । ତେବେ ମୃତ ସନ୍ତୋଷ ରାଇତୈଳା ଗ୍ରାମର ଅର୍ଜୁନ ଜେନାଙ୍କ ଝିଅକୁ ବିବାହ କରିଥିଲେ । ମାତ୍ର ସନ୍ତୋଷ ମଦ୍ୟପାନ କରି ପତ୍ନୀଙ୍କୁ ନିର୍ଯାତନା ଦେଉଥିବା ନେଇ ଥାନାରେ ମଧ୍ୟ ମାମଲା ରହିଛି ।
ଫଳରେ ପତ୍ନୀ ଶାଶୁଘର ଛାଡି ନିଜ ବାପା ଘର ରାଇତୈଳାକୁ ପଳାଇ ଆସିଥିବାରୁ ସନ୍ତୋଷ ତାଙ୍କୁ ନେବାପାଇଁ ଆସିଥିଲେ । ମାତ୍ର ସେ ଯିବାକୁ ମନା କରିବା ସହ ପୋଲିସରେ ଅଭିଯୋଗ କରିବା ଧମକ ପାଇ ନିରାଶ ହୋଇଥିଲେ ବୋଲି ଜଣାପଡିଛି । ଫଳରେ ସନ୍ତୋଷ ହତାସ ହୋଇ ଏପରି ଆତ୍ମହତ୍ୟା କରିଥିବା ସନ୍ଦେହ କରାଯାଇଛି ।
ଢେଙ୍କାନାଳରୁ ଉର୍ମିଲା ପାତ୍ର, ଇଟିଭି ଭାରତ
