ଢେଙ୍କାନାଳ: ସରିଯାଇଛି ଭୋଟ ଗଣତି ପ୍ରକ୍ରିୟା ଆସିଛି ଫଳାଫଳ । ଭୋଟର ନିର୍ଦ୍ଧାରଣ କରିଛନ୍ତି ପ୍ରାର୍ଥୀଙ୍କ ଭାଗ୍ୟ । ତେବେ ଢେଙ୍କାନାଳ ଜିଲ୍ଲା କାମାକ୍ଷାନଗର ବିଜ୍ଞାପିତ ଅଞ୍ଚଳ ପରିଷଦକୁ ଦଖଲ କଲା ବିଜେଡି । ବିଜେଡିର ଧର୍ମାନନ୍ଦ ପରିଡା ବିଜୟଲାଭ କରିଛନ୍ତି । କାମାକ୍ଷାନଗର ବିଜ୍ଞାପିତ ଅଞ୍ଚଳ ଅଧ୍ୟକ୍ଷ ପ୍ରାର୍ଥୀ ଭାବେ ବିଜେଡିର ଧର୍ମାନନ୍ଦ ପରିଡା ମୋଟ ୮୨୫୬ ଖଣ୍ଡ ଭୋଟ ପାଇବା ସହ ବିଜେପିର ନିକଟତମ ପ୍ରତିଦ୍ବନ୍ଦ୍ବୀ ରଣଜିତ ସାହୁଙ୍କୁ ହରାଇ ବିଜୟ ଲାଭ କରିଛନ୍ତି ।
ଧର୍ମାନନ୍ଦ ପରିଡା ୬୪୬୩ ଖଣ୍ଡ ଅଧିକ ଭୋଟ ପାଇ ରଣଜିତ ସାହୁଙ୍କ ଠାରୁ ବଡ ବ୍ୟବଧାନରେ ବିଜୟୀ ହୋଇଛନ୍ତି। କାମାକ୍ଷାନଗରରେ ସମୁଦାୟ ୧୫ ଟି ଓ୍ବାର୍ଡକୁ ହାତେଇଛି ବିଜେଡି । ୧,୬,୭,୮ଓ ୧୩ ନଂ ଓ୍ବାର୍ଡରେ ବିଜେଡି ପ୍ରାର୍ଥୀ ନିର୍ଦ୍ବନ୍ଦରେ ନିର୍ବାଚିତ ହୋଇଥିଲେ । ସେହିପରି ୨ ନମ୍ବର ଓ୍ବାର୍ଡରେ ସକୁନ୍ତଳା ସେଠୀ ୯୩ ଖଣ୍ଡ ଭୋଟ ବ୍ୟବଧାନରେ ବିଜୟୀ ହୋଇଥିବା ବେଳେ ୩ ନମ୍ବର ଓ୍ବାର୍ଡରେ ଲୋପାମୁଦ୍ରା ନାଏକ ଏବଂ ୪ ନମ୍ବର ଓ୍ବାର୍ଡରେ ରିତା ନାଏକ ୧୪୮ ଖଣ୍ଡ ଭୋଟରେ ବିଜୟୀ ହୋଇଛନ୍ତି ।
୫ ନମ୍ବର ଓ୍ବାର୍ଡରେ ସରୋଜ ମହାଳିକ ୨୮୦ ଖଣ୍ଡ ଭୋଟରେ ବିଜୟୀ ହୋଇଥିବାବେଳେ ୯ ନମ୍ବର ଓ୍ବାର୍ଡରେ ଜିତେନ୍ଦ୍ର ରାଉଳ ୨୬୧ ଖଣ୍ଡ ଭୋଟରେ ଏବଂ୧୦ ନଂ ଓ୍ବାର୍ଡରେ ସୌମ୍ୟାଶ୍ରୀ ଜୀ ୮୫୨ ଖଣ୍ଡ ଭୋଟରେ ବିଜୟୀ ହୋଇଛନ୍ତି।
୧୧ ନଂ ଓ୍ବାର୍ଡରେ ପ୍ରମୋଦ ଶେଣ୍ଢ ୮୫୭ ଖଣ୍ଡ ଭୋଟରେ, ୧୨ ନଂ ଓ୍ବାର୍ଡରେ ବନମାଳି ରାଉଳ ୪୬୦ ଖଣ୍ଡ ଭୋଟରେ , ୧୪ ନଂ ଓ୍ବାର୍ଡରେ ଖୋଲଣା ବେହେରା ୪୩୪ ଖଣ୍ଡ ଭୋଟରେ ବିଜୟୀ ହେବା ସହ କାମାକ୍ଷାନଗର NAC ରେ କ୍ଲିନସ୍ବିପ କରିଛି ବିଜେଡି । ଏକ ବଡ଼ ବିଜୟ ପରେ କର୍ମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ବାଣ ଫୁଟାଇ ବିଜୟ ଉତ୍ସବ ପାଳନ କରିଛନ୍ତି ବିଜେଡି କର୍ମୀ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
