ନିଆଳି: ଭାରତୀୟ ସଂସ୍କୃତି, ଐତିହ ଓ ପରମ୍ପରାରେ ଶକ୍ତି ଉପାସନା ପ୍ରାଚୀନ କାଳରୁ ରହି ଆସିଛି । ସଂସାରର ପ୍ରତିଟି ବସ୍ତୁ ସେହି ଅଦୃଶ୍ୟ ଶକ୍ତି ମାଧ୍ୟମରେ ପରିଚାଳିତ ବୋଲି ପ୍ରାୟ ସଭିଁଏ ବିଶ୍ବାସ କରନ୍ତି । ସେଭଳି ଏକ ପୀଠ ହେଉଛି କଟକ ଜିଲ୍ଲା ନିଆଳି ବ୍ଲକ ପୋଡ଼ପୋଡାର ପ୍ରସିଦ୍ଧ ମା’ ଦକ୍ଷିଣକାଳୀ ପୀଠ । ଏହି ପୀଠରେ ମା'ଙ୍କ ପୂଜା ରୀତିନୀତି ଟିକେ ସ୍ବତନ୍ତ୍ର। ଏଠି ମନସ୍କାମନା ପୂରଣ ପାଇଁ ପଡେ ପଶୁବଳି । କିନ୍ତୁ ଏବେ ସରକାରୀ କଟକଣା ପାଇଁ ବଳିପ୍ରଥା ବନ୍ଦ ଥିବା ବେଳେ ଏବେ କେବଳ ମା'ଙ୍କ ନିକଟରେ ପଶୁମାନଙ୍କୁ କରାଯାଉଛି ସର୍ମପଣ ।
ଏଠାରେ ମା'ଙ୍କୁ ଯିଏ ଯେମିତି ଭକ୍ତି ଓ ଭାବନା ସହ ଡାକିଛି, ତାର ମନସ୍କାମନା ପୂରଣ ହୋଇଛି । ଏଭଳି ଅନେକ ଉଦାହରଣ ରହିଛି। ତେବେ ମନସ୍କାମନା ପୂରଣ ହେଲେ ଏହି ପୀଠରେ ଛେଳି, ମେଣ୍ଢା ଓ ବୋଦା ବଳି ପକାଇବାର ପ୍ରଥା ରହିଛି । ଏହାସହ ଏଠାରେ ଦୁଇ ଦିନ ହେଉଥିବା ଯାତ୍ରାରେ ଦୋକାନ ବଜାର ଓ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ। ଚଳିତ ବର୍ଷ କରୋନା କଟକଣାକୁ ଦୃଷ୍ଟିରେ ରଖି ମା'ଙ୍କ ପୂଜା କରିଯିବା ସହ ଭକ୍ତଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଛି।
ନିଆଳିରୁ ଉମେଶ ଚନ୍ଦ୍ର ମଲ୍ଲିକ, ଇଟିଭି ଭାରତ
