କଟକ: ଆଜି କଳାଧନ ଠୁଳ ସମ୍ପର୍କିତ ଏସଆଇଟି ଗୁରୁତ୍ୱପୂର୍ଣ୍ଣ ବୈଠକ କଟକ ତେଲେଙ୍ଗା ବଜାର ସ୍ଥିତ ଜଷ୍ଟିସ ଅରଜିତ ପଶାୟତଙ୍କ ବାସ ଭବନରେ ଶେଷ ହୋଇଛି । ଆସନ୍ତା ୨ ମାସ ମଧ୍ୟରେ ଏସଆଇଟି ସୁପ୍ରିମକୋର୍ଟରେ ସପ୍ତମ ରିପୋର୍ଟ ପ୍ରଦାନ କରିବାକୁ ଯାଉଛନ୍ତି । ସ୍ୱିସ ବ୍ୟାଙ୍କ ନାମ ଘୋଷଣା କରିଥିବା ଆଉ ୫୦ ଜଣ ଭାରତୀୟଙ୍କୁ ଏସଆଇଟି ନୋଟିସ ଦେବ । ଆୟର ଉତ୍ସ ଦେଖାଇ ନପାରିଲେ କାର୍ଯ୍ୟାନୁଷ୍ଠାନ ନିଆଯିବ । ଏହାସହ ଗତ ନିର୍ବାଚନ ରେ ଜବତ ହୋଇଥିବା ୩ ହଜାର ୮୦୦ କୋଟି ଟଙ୍କା କେଉଁଠୁ ଆସିଲା ତାହାର ମଧ୍ୟ ତଦନ୍ତ ଆରମ୍ଭ କରିଛି ଏସଆଇଟି ।
ସରିଲା ଏସଆଇଟି ଗୁରୁତ୍ୱପୂର୍ଣ ବୈଠକ । ଏବେ ତର୍ଜମାର ବେଳ। ବୈଠକ ଆରମ୍ଭରୁ ଗତ ନିର୍ବାଚନ ରେ ନେତାଙ୍କ ଖର୍ଚ୍ଚ ନେଇ ଜୋର ଧରିଥିଲା ଆଲୋଚନା । ବିପୁଳ ପରିମାଣର ଟଙ୍କା ସହ
ନାର୍କୋଟିକସ ଡ୍ରଗ୍ସ ଓ ଡାଇମଣ୍ଡ ମଧ୍ୟ ଦେଶର ବିଭିନ୍ନ ସ୍ଥାନରେ ଜବତ ହୋଇଛି । ଜବତ ହୋଇଥିବା ୩ ହଜାର ୮୦୦ କୋଟି ଟଙ୍କାର ଉତ୍ସ ସମ୍ପର୍କରେ ତଦନ୍ତ କରୁଛି ଏସଆଇଟି । ତେବେ କଳାଧନ ସମ୍ପର୍କିତ ଘଟଣାର ସମାଧାନ ପାଇଁ ଏକ ସ୍ବତନ୍ତ୍ର କୋର୍ଟ ସହ ଆଇନର ସଂଶୋଧନର ଆବଶ୍ୟକ ବୋଲି ମତ ରଖିଛନ୍ତି ଜଷ୍ଟିସ ଅରଜିତ ପଶାୟତ ।
ଓଡ଼ିଶାରେ ବିଭିନ୍ନ ବିଭାଗ ଦ୍ଵାରା ଗତ ୬ ମାସରେ ରେଡ଼ ବା ଚଢ଼ାଉ ସଂଖ୍ୟା ବଢିଛି । ସିବିଆଇ ମାଇକ୍ରୋ ଫାଇନାନ୍ସ ଲିମିଟେଡ଼ କମ୍ପାନୀର ୯୦ ଲକ୍ଷ ଟଙ୍କା ଜବତ କରିଥିବାବେଳେ ତାହାର ଷ୍ଟାଟସ ରିପୋର୍ଟ ନେଇଛନ୍ତି ଏସଆଇଟି । ତେବେ ଏସଆଇଟି ଅଦ୍ୟାବଧି ସୁପ୍ରିମକୋର୍ଟଙ୍କ ନିକଟରେ ୬ଟି ରିପୋର୍ଟ ଦାଖଲ ସାରିଥିବା ବେଳେ ଆଗାମୀ ୨ ମାସ ମଧ୍ୟରେ ସପ୍ତମ ରିପୋର୍ଟ ପ୍ରଦାନ କରିବ । ଆଉ ଆଜିର ଏହି ବୈଠକରେ ପୋଲିସ ଡିଜି, ଭିଜିଲାନ୍ସ ନିର୍ଦ୍ଦେଶକ, କ୍ରାଇମବ୍ରାଞ୍ଚ ଏଡିଜିଙ୍କ ସହ ବିଭିନ୍ନ ବିଭାଗର ୨୨ ଜଣ ଅଧିକାରୀ ଯୋଗ ଦେଇଥିଲେ। ପୂର୍ବରୁ କଟକରେ 6 ଥର ଏସଆଇଟି ବୈଠକ ବସିସାରିଥିବା ବେଳେ ବିଭିନ୍ନ ଦିଗକୁ ନେଇ ଆଲୋଚନା କରାଯାଇଛି।
କଟକରୁ ନାରାୟଣ ସାହୁ, ଇଟିଭି ଭାରତ
