କଟକ: ସୁନ୍ଦରଗଡ ସିଡିଏମଓଙ୍କ ନିଲମ୍ବନକୁ ବିରୋଧ କଲା କଟକ ଏସସିବି ଜୁନିଅର ଡାକ୍ତର ସଂଘ । ବିନା କାରଣ ଦର୍ଶାଅ ନୋଟିସରେ ଜଣେ ଉଚ୍ଚପଦସ୍ଥ ଅଧିକାରୀଙ୍କ ନିଲମ୍ବନକୁ ସଂଘ କଡା ନିନ୍ଦା କରିବା ସହ ବିରୋଧ କରିଛି ।
ଭିଡିଓ ସୌଜନ୍ୟ: ସମ୍ବାଦଦାତା, କଟକ
ସୂଚନାନୁସାରେ, 'ମୋ ସରକାର' କାର୍ଯ୍ୟକ୍ରମର ସମୀକ୍ଷା ସମୟରେ ଦାୟିତ୍ବରେ ଅବହେଳା ଦର୍ଶାଇ ରବିବାର ସୁନ୍ଦରଗଡ଼ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ପଙ୍କଜ ପଟେଲଙ୍କୁ ନିଲମ୍ବିତ କରାଯାଇଥିଲା । ଯାହାକୁ ବିଭିନ୍ନ ମହଲରେ ତୀବ୍ର ନିନ୍ଦା କରାଯାଇଛି । ଏହି କ୍ରମରେ ମଙ୍ଗଳବାର କଟକ ଏସସିବି ଜୁନିଅର ଡାକ୍ତର ସଂଘ ମଧ୍ୟ ରାଜ୍ୟ ସରକାରଙ୍କ ନିଷ୍ପତ୍ତିକୁ ଏକତରଫା ଦର୍ଶାଇଛି । ଏଥିସହିତ ଏସସିବି ମେଡିକାଲ ପରିସରରେ ଶାନ୍ତିପୂର୍ଣ୍ଣ ଶୋଭାଯାତ୍ରା କରି ନିଷ୍ପତ୍ତିର ପୁନର୍ବିଚାର ପାଇଁ ସଂଘ ପକ୍ଷରୁ ଦାବି ହୋଇଛି । ଯଦି ଆଗାମୀ ଦିନରେ ମାମଲାର ସମାଧାନ ନହୁଏ ତେବେ ସଂଘ ଦୃଢ ପଦକ୍ଷେପ ନେବ ବୋଲି ଚେତାବନୀ ଦେଇଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
