କଟକ: ସିଲଭରସିଟି ପାଲଟିଛି ନକଲି ସାମଗ୍ରୀର ଗନ୍ତାଘର। ପୂର୍ବରୁ ଘିଅ ତେଲ ମସଲା ସୋୟବିନ ପରେ ଆଜି ଜବତ ହୋଇଛି କୁଇଣ୍ଟାଲ କୁଇଣ୍ଟାଲ ଗୁଣ୍ଡି । ସଦର ଥାନା ଅଧିନରେ ଥିବା ସାଷୋଳ ଗ୍ରାମର 3 ଟି ଗୋଦାମ ରୁ ଜବତ ହୋଇଛି ବିପୁଳ ପରିମାଣର ଗୁଣ୍ଡି । ପ୍ୟାକେଟରେ ଅସଲି ଫଟୋ ଲଗାଇ ବିକ୍ରି ହେଉଛି ନକଲି ସମଗ୍ରୀ ।
କଟକ ସଦର ଥାନା ଅଧୀନରେ ଥିବା ସାଷୋଳ ଗ୍ରାମର 3 ଟି ଗୋଦାମରେ ଅନେକ ବର୍ଷ ଧରି ବ୍ୟବସାୟ କରି ଆସୁଥିବା ଏହି ଗୋଦାମ ଏବେ ପୋଲିସ ପଞ୍ଝାରେ । ଏହି ମାମଲାରେ ଜଣଙ୍କୁ ଅଟକ ରଖିଛି ପୋଲିସ । ତେବେ ଏହି ଗୁଣ୍ଡିରେ ମିଶୁଥିଲା ଶୁଖିଲା ପତ୍ର , ଇଟା ଗୁଣ୍ଡ , କାଠ ଗୁଣ୍ଡ ଇତ୍ୟାଦି। ତେବେ କମିଶନରେଟ ପୋଲିସର ଏହି 24 ତମ ରେଡ଼ ଆସିଛି ଗୁଣ୍ଡିର ଚିତ୍ର। ଅନ୍ୟପଟେ ଏହି ଘଟଣା ସିଲଭରସିଟିରେ ବଢାଇଛି ଚିନ୍ତା । କାରଣ ଅନେକ ଲୋକ ପାନରେ ଗୁଣ୍ଡି ଖାଇବାକୁ ପସନ୍ଦ କରନ୍ତି । କିନ୍ତୁ ଏହି ଚିତ୍ର ଦେଖିଲା ପରେ ଲୋକଙ୍କ ମନରେ ଭୟ ପଶିବା ସ୍ବାଭାବିକ । କାରଣ ଏଥିରେ ମିଶୁଛି ଅନେକ କେମିକାଲ ଓ ବିଭିନ୍ନ ନକଲି ସାମଗ୍ରୀ । ଯାହା ସ୍ପଷ୍ଟ କରୁଛି ମଣିଷ ଶରୀର ପ୍ରତି ଏହା କେତେ କ୍ଷତିକାରକ ।
ସିଲଭରସିଟିରେ କଳଙ୍କ ସାଜିଛି ନକଲି କାରଖାନା । ଏଯାବତ୍ ଅନେକ ନକଲି କାରଖାନା ଠାଵ କରି ସାରିଲାଣି କମିଶନରେଟ ପୋଲିସ । ତେବେ ଏପରି ନକଲି କାରଖାନାଗୁଡିକର ଚେର କେତେ ଲମ୍ବିଛି ତାହାକୁ ନେଇ ଲୋକଙ୍କ ମନରେ ଛନକା ପଶିବା ସହ ଖାଉଟିଙ୍କ ସୁରକ୍ଷାକୁ ନେଇ ଉଠିଛି ବଡ ପ୍ରଶ୍ନ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
