ଭୁବନେଶ୍ବର: ଫନି ପରେ ପାଠ ପଢିବାକୁ ଆଲୋକ ସନ୍ଧାନରେ ଛାତ୍ରଛାତ୍ରୀ । କେଉଁଠି ଓ କିପରି ପାଠ ପଢିବେ ସେଥିପାଇଁ ଚିନ୍ତାରେ । ବିଦ୍ୟୁତ ଆଲୁଅରେ ପାଠ ପଢିବାକୁ ବହୁ ଆଶାରେ ରାଜ୍ୟ ଲାଇବ୍ରେରୀକୁ ଆସିଥିଲେ । ହେଲେ ଏଠି ବି ସମାନ ପରିସ୍ଥିତି । ଏଥିରେ ଉତ୍ତେଜିତ ହୋଇ କର୍ତ୍ତୁପକ୍ଷଙ୍କ ଅବହେଳା ଓ ଦୁର୍ନୀତି ଅଭିଯୋଗ ଦର୍ଶାଇ ଲାଇବ୍ରେରୀ ଗେଟରେ ତାଲା ପକାଇ ଦେଇଛନ୍ତି ଛାତ୍ରଛାତ୍ରୀ ।
ବାତ୍ୟା ପ୍ରଭାବରେ ବିଦ୍ୟୁତ ସେବା ବାଧାପ୍ରାପ୍ତ ହୋଇଛି । ଏଥିଯୋଗୁଁ ବିଭିନ୍ନ ଏଣ୍ଟ୍ରାନ୍ସ ଓ କମ୍ପିଟେଟିଭ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ପିଲାଙ୍କ ଗୋଟିଏ ସାହାରା ରାଜ୍ୟ ଲାଇବ୍ରେରୀ । ହେଲେ ଏଠି କିନ୍ତୁ ଅଲଗା ସ୍ଥିତି ।
ଏପରିକି ଏଠାରେ 2ଟି ଡିଜି ସେଟ ଥିଲେ ମଧ୍ୟ କର୍ତ୍ତୃପକ୍ଷ ଏହାକୁ ନ ଲଗାଇ ଏଥିରେ ପଡ଼ିବାକୁ ଆସୁଥିବା ତେଲକୁ ହଡପ କରିଦିଅନ୍ତି ବୋଲି ଛାତ୍ରଛାତ୍ରୀ ଅଭିଯୋଗ କରିଛନ୍ତି । ବାରମ୍ବାର କହିବା ସତ୍ତ୍ବେ କର୍ତ୍ତୃପକ୍ଷ କୌଣସି ପଦକ୍ଷେପ ନ ନେବାରୁ ଏମାନେ ଲାଇବ୍ରେରୀ ଗେଟରେ ତାଲା ପକାଇଛନ୍ତି । ଫଳରେ ଏଠାରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ଏହାକୁ ନେଇ ଯୁକ୍ତିତର୍କ ହେବାରୁ ଲାଇବ୍ରେରୀ ଆଟେଣ୍ଡାଣ୍ଟ କେତେକ ଛାତ୍ରଙ୍କୁ ମାଡ଼ମାରିଥିବା ମଧ୍ୟ ଅଭିଯୋଗ ହୋଇଛି ।
ଏଥିରେ ଗରମ ହୋଇ ଛାତ୍ରଛାତ୍ରୀ କୌଣସି କର୍ମଚାରୀଙ୍କୁ ଲାଇବ୍ରେରୀ ଭିତରୁ କିମ୍ବା ବାହାରକୁ ଛାଡି ନଥିଲେ । ଯଥାଶୀଘ୍ର ଏହାର ସମାଧାନ କରିବା ସହିତ ଆଟେଣ୍ଡାଣ୍ଟ କ୍ଷମା ପାର୍ଥନା କରନ୍ତୁ ବୋଲି ଛାତ୍ରମାନେ ଦାବି କରିଥିଲେ । ଯଦି ଦାବି ପୂରଣ ନ ହୁଏ ତେବେ ଆମେ ରାଜରାସ୍ତାକୁ ଓଲ୍ଲାଇବାକୁ ବୋଲି ମଧ୍ୟ ଚେତାବନୀ ଦେଇଛନ୍ତି ।
ଏ ବିଷୟରେ ଲାଇବ୍ରେରୀଆନଙ୍କ ମତ ନେବାକୁ ଚାହିଁବାରୁ, ଘଟଣା ନେଇ କହିବାକୁ ଉପଯୁକ୍ତ ଅଧିକାରୀ ନାହାଁନ୍ତି କହି କଥା କାଟିଦେଇଥିଲେ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
