ଭୁବନେଶ୍ୱର: ଦୀର୍ଘ ବର୍ଷ ଧରି ଓଡ଼ିଶାର ଜନସାଧାରଣଙ୍କ ଜୀବନ ଜୀବିକାର ମୁଖ୍ୟ ଭୂମିକା ନିର୍ବାହ କରିବା ସହ ଅନବରତ ସେବା ଯୋଗାଇ ଆସୁଛି ଭାରତୀୟ ଡାକ । ଚଳିତ ବର୍ଷରେ ଅନେକ ଆର୍ଥିକ ଉପଲବ୍ଧି ହାସଲ କରିବାରେ ସଫଳ ମଧ୍ୟ ହୋଇଛି । ନୂତନ ହିତାଧିକାରୀଙ୍କ ଖାତା ଖୋଲିବା ଠାରୁ ଆରମ୍ଭ କରି ପୋଷ୍ଟାଲ ଲାଇଫ ଇନସ୍ୟୁରାନ୍ସ ପ୍ରିମିୟମ ଆଦାୟ ଏବଂ ଅନ୍ୟାନ୍ୟ କ୍ଷେତ୍ରରେ ଗତବର୍ଷ ତୁଳନାରେ ଯଥେଷ୍ଟ ଅଧିକ ରାଜସ୍ୱ ସଂଗ୍ରହ କରିବାରେ ସଫଳ ହୋଇଛି । ସେହିଭଳି ବିଗତ 30 ବର୍ଷ ପରେ ଓଡ଼ିଶାରେ 2ଟି ନୂଆ ଡିଭିଜନ ସୃଷ୍ଟି କରି ଏହି ସେବାକୁ ଆହୁରି ସମୃଦ୍ଧ କରିବାକୁ ପ୍ରୟାସ କରାଯାଇଛି ।
ସେହିପରି ଚଳିତ ବର୍ଷ ଅନ ଲାଇନ ଜରିଆରେ 4 ହଜାର 392 ଗ୍ରାମୀଣ ଡାକ ସେବକ ନିଯୁକ୍ତି ଦିଆଯାଇଛି । ବିଭିନ୍ନ ସ୍ମାରକୀ ମୁଦ୍ରା ଯଥା ଗତ ହକି ବିଶ୍ୱକପ, ପାଇକ ବିଦ୍ରୋହ, ଉତ୍କଳ ବିଶ୍ଵବିଦ୍ୟାଳୟ ପ୍ଲାଟିନମ ଜୟନ୍ତୀ ସ୍ମାରକୀ ସମେତ 45 ଟି ସ୍ୱତନ୍ତ୍ର କଭର ମଧ୍ୟ ଉନ୍ମୋଚିତ ହୋଇଛି । ସେହିପରି ଏହି ସମୟ ମଧ୍ୟରେ 4ଟି 'ମୋ' ଟିକେଟ କାଉଣ୍ଟର ମଧ୍ୟ ଖୋଲା ଯାଇଥିବା ସେ ପ୍ରକାଶ କରିଛନ୍ତି । ବୈଦେଶିକ ଡାକ ସେବାରେ ବୁକିଂ କୋଲକାତାରେ ହେଉଥିବା ହେତୁ ସେଥିରେ ଅହେତୁକ ବିଳମ୍ବ ହେଉଛି । ତେଣୁ ସେହି ସମସ୍ୟାର ସମାଧାନ କରିବା ପାଇଁ ଓଡ଼ିଶାରେ ଗୋଟିଏ ବିଦେଶୀ ପୋଷ୍ଟ ଅଫିସ କରିବା ପାଇଁ କାର୍ଯ୍ୟ ଚାଲୁ ରହିଥବା କହିଛନ୍ତି ସନ୍ତୋଷ କୁମାର ।
ରାଜ୍ୟରେ ଡାକ ପାର୍ସଲ ସେବାରେ ଉନ୍ନତି ଘଟିଥିବା ବେଳେ ଏ କ୍ଷେତ୍ରରେ ଆହୁରି ସୁଧାର ଆଣିବା ପାଇଁ ଭୁବନେଶ୍ବରରେ ଗୋଟିଏ ଜାତୀୟ ପାର୍ସଲ ହବ୍ ସମେତ ରାଜ୍ୟର କଟକ, ଯାଜପୁର ରୋଡ, ବାଲେଶ୍ଵର, ସମ୍ବଲପୁର, ବଲାଙ୍ଗୀର, ବ୍ରହ୍ମପୁର ଏବଂ ଜୟପୁର ଠାରେ 7ଟି ରାଜ୍ୟ ପାର୍ସଲ ହବ୍ ନିର୍ମାଣ କରାଯାଇଛି । ତିନୋଟି ନୋଡାଲ ଡେଲିଭରୀ ସେଣ୍ଟର ମଧ୍ୟ ଭୁବନେଶ୍ବରର ସତ୍ୟନଗର, ରସୁଲଗଡ଼ ଓ ବରମୁଣ୍ଡା ଠାରେ କାର୍ଯ୍ୟକରୁଛି ।
ଗତବର୍ଷ 1.9.2018 ରେ ଇଣ୍ଡିଆ ପୋଷ୍ଟ ପେମେଣ୍ଟସ ବ୍ୟାଙ୍କ ଲଞ୍ଚ କରାଯାଇଥିବା ବେଳେ ବର୍ତ୍ତମାନ ସୁଦ୍ଧା 33 ଟି ବ୍ରାଞ୍ଚ କାର୍ଯ୍ୟକାରୀ ହେଉଛି । ଯାହା ଦ୍ୱାରା 2094898 ଆଇପିପିବି ଆକାଉଣ୍ଟ ଖୋଲାଯାଇଛି । ଆହୁରି ମଧ୍ୟ ପୋଷ୍ଟ ଅଫିସ କୁ ଡିଜିଟାଲ ସଂଯୋଗୀକରଣ କରି ଦର୍ପଣ ଯୋଜନା ମାଧ୍ୟମରେ ଲୋକଙ୍କୁ ଏହାର ସୁବିଧା ପ୍ରଦାନ କରାଯାଉଥିବା ସେ କହିଛନ୍ତି।
ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ବ୍ରହ୍ମପୁର ମୁଖ୍ୟ ଡାକପାଳ ଜଳେଶ୍ବର କହଁର ଓ ଡାକପାଳ ଜି ଗୁରୁନାଥ ପ୍ରମୁଖ ଉପସ୍ଥିତ ଥିଲେ।
ଭୁବନେଶ୍ୱରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
