ବୌଦ୍ଧ: ଅବ୍ୟବସ୍ଥା ଘେରରେ ଦୁଇ ଦୁଇଟି ପ୍ରାଣୀଧନ ଚିକିତ୍ସା କେନ୍ଦ୍ର । ଗୋଟିଏ କେନ୍ଦ୍ରରେ ଏଲଆଇ ନିଯୁକ୍ତି ହୋଇ ନଥିବାରୁ ଅଫିସ କୋଠା ଭୂତକୋଠୀ ପାଲଟିଥିବା ବେଳେ ଅନ୍ୟଟିରେ ଏଲଆଇମାନେ ଫିଲ୍ଡ ନାଁରେ ଅନୁପସ୍ଥିତ ରହୁଥିବା ଅଭିଯୋଗ ହୋଇଛି । ବୌଦ୍ଧ ଜିଲ୍ଲାର କେତେକ ପ୍ରାଣୀଧନ କେନ୍ଦ୍ରରେ ଦେଖାଦେଇଛି ଏଭଳି ଅବ୍ୟବସ୍ଥା ।
ସୂଚନାଯୋଗ୍ୟ, ବୌଦ୍ଧ ଜିଲ୍ଲାର ଉପାନ୍ତ ଶଗଡା ପଞ୍ଚାୟତରେ ଦୀର୍ଘ ବର୍ଷ ହେଲା ପ୍ରାଣୀଧନ ଚିକିତ୍ସା କେନ୍ଦ୍ର ସ୍ଥାପିତ ହୋଇଥିଲେ ମଧ୍ୟ ଏଲଆଇ ନିଯୁକ୍ତି ହୋଇ ନଥିବାରୁ ଚାଷୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଏବଂ କେନ୍ଦ୍ରର କୋଠାଟି ଭୂତକୋଠୀ ପାଲଟିଛି । ସେହିପରି ଧଳପୁର ଠାରେ ଥିବା ପ୍ରାଣୀଧନ କେନ୍ଦ୍ରରେ ଏଲଆଇ ଫିଲ୍ଡ ଆଳରେ ଅନୁପସ୍ଥିତ ରହୁଥିବାରୁ ଗୋପାଳକମାନେ ପ୍ରାୟ ସମୟରେ ନାନା ସମସ୍ୟାରେ ପଡୁଛନ୍ତି । ତେବେ ଶଗଡ କେନ୍ଦ୍ରର ସମସ୍ୟାକୁ ବିଭାଗୀୟ ଅଧିକାରୀମାନେ ସ୍ବୀକାର କରିଥିବା ବେଳେ ଧଳପୁର କେନ୍ଦ୍ରର ଏଲଆଇ ଅନୁପସ୍ଥିତ ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସଡିଭିଓ ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
