ବୌଦ୍ଧ: ଜିଲ୍ଲାର ଅପହଞ୍ଚ ଇଲାକାରେ ପହଞ୍ଚି ପାରୁନି ସରକାରଙ୍କ ବିକାଶ ଗାଡି । ସାତ ସମୁଦ୍ର ତେର ନଈର ଗପରି ଭଳି ମନେ ହୁଏ ଏସବୁ ଅଞ୍ଚଳର କରୁଣ କାହାଣୀ । ସାଧାରଣ ଜୀବନ ଠାରୁ ଢେର ଦୂରରେ ଆଜିବି ଅତ୍ୟନ୍ତ ଅବହେଳିତ ଅବସ୍ଥାରେ କାଳ କାଟୁଛନ୍ତି ଲୋକ । ଏଭଳି ଏକ ଗ୍ରାମ ହେଲା ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ଛତରଙ୍ଗ ପଞ୍ଚାୟତ ଅନ୍ତର୍ଗତ ବାନ୍ଦିଗାଡୁ ଗ୍ରାମ ।
ବୌଦ୍ଧ ଜିଲ୍ଲାର ତିନୋଟି ବ୍ଲକରେ ଏଭଳି ଦେଢଶହରୁ ଉର୍ଦ୍ଧ୍ବ ଅପହଞ୍ଚ ଗ୍ରାମ ରହିଛି । ତନ୍ମଧ୍ୟରୁ ବାନ୍ଦିଗାଡୁ ଗ୍ରାମ ଅନ୍ୟତମ । ସମ୍ପୂର୍ଣ୍ଣ ଆଦିବାସୀ ଅଧ୍ୟୁଷିତ ଏହି ଗ୍ରାମକୁ ବର୍ଷ ତମାମ ବାହ୍ୟ ଜଗତରୁ ବିଭିନ୍ନ ଜଙ୍ଗଲ ପାହାଡ ସହ ଝରଣା ବିଛିନ୍ନ କରି ରଖିଥାଏ । ଶିକ୍ଷା, ସ୍ବାସ୍ଥ୍ୟ, ବିଦ୍ୟୁତ, ପାନୀୟଜଳ ଭଳି ଯୋଜନା ଏଠାରେ ସାତ ସପନ । ଆଉ ଏହାର ପ୍ରମୁଖ କାରଣ ହେଲା ଯୋଗାଯୋଗରେ ବିଛିନ୍ନତା ।
ଏହି ବାନ୍ଦିଗାଡୁ ଗ୍ରାମରେ ସରକାରଙ୍କ ବିକାଶ ପହଞ୍ଚାଇବା ଲକ୍ଷ୍ୟରେ ପ୍ରାୟ ବର୍ଷେ ପୂର୍ବରୁ ବୌଦ୍ଧର ତତ୍କାଳୀନ ପିଡି ଡିଆରଡିଏ ସୂର୍ଯ୍ୟ ନାରାୟଣ ଦାସ ପ୍ରାୟ ପନ୍ଦର କିଲୋମିଟରରୁ ଉର୍ଦ୍ଧ୍ବ ଜଙ୍ଗଲ ଭିତରେ ଚାଲି ଚାଲି ଯାଇ ପହଞ୍ଚିଥିଲେ । ଗାଁରେ କେବେ ବି ଆମ୍ବୁଲାନ୍ସ କିମ୍ବା କୌଣସି ପ୍ରଶାସନିକ ଅଧିକାରୀଙ୍କୁ ଦେଖିନଥିବା ଗ୍ରାମବାସୀ ପିଡିଙ୍କୁ ଦେଖି ଅନେକ ଆଶା ବାନ୍ଧିବା ସହ ଅନେକ ସ୍ବପ୍ନ ମଧ୍ୟ ଦେଖିଥିଲେ । ତେବେ ବର୍ତ୍ତମାନ ସେହି ସ୍ବପ୍ନ ସ୍ବପ୍ନରେ ରହିଯାଇଛି । ଏ ସମ୍ପର୍କରେ ସ୍ଥାନୀୟ ଜନ ପ୍ରତିନିଧି ମଧ୍ୟ ଗଭୀର ଉଦବେଗ ପ୍ରକାଶ କରିଛନ୍ତି । ଏନେଇ ଜିଲ୍ଲା ପ୍ରଶାସନ ଓ ସରକାର ସ୍ବତନ୍ତ୍ର ଦୃଷ୍ଟି ଦେଇ ପଦକ୍ଷେପ ଗ୍ରହଣ ପାଇଁ ଦାବି ହୋଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
