ବୌଦ୍ଧ: ଲକ ଡାଉନର ଷଷ୍ଠ ଦିନରେ ଜିଲ୍ଲାର କେତେକ ନିର୍ଦ୍ଦିଷ୍ଟ ସ୍ଥାନରେ ଦେଶୀ ଓ ବିଦେଶୀ ମଦ ଦୋକାନ ଖୋଲା ଯାଇଥିଲା ଦେଖିବାକୁ ମିଳିଛି । ଏପରିକି କେତେକ ଦୋକାନରେ ଛୋଟ ପିଲା ମାନଙ୍କୁ କାମରେ ନିୟୋଜିତ କରାଯାଇଥିବା ଦେଖିବାକୁ ମିଳିଥିଲା । ଏହାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ସମାଲୋଚନା କରାଯାଇଥିବା ବେଳେ ପ୍ରଶାସନ ଏହାର ତଦନ୍ତ କରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରତିଶ୍ରୁତି ଦେଇଛନ୍ତି ।
ଲକଡାଉନର ଷଷ୍ଠ ଦିନରେ ବୌଦ୍ଧ ଜିଲ୍ଲାରେ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା । ଅବକାରୀ ବିଭାଗର ନିର୍ଦ୍ଦେଶ କ୍ରମେ ଜିଲ୍ଲାର କେତେକ ନିର୍ଦ୍ଦିଷ୍ଟ ଦେଶୀ ଓ ବିଦେଶୀ ମଦ ଦୋକାନ ବିଭାଗୀୟ ଅଧିକାରୀଙ୍କ ଉପସ୍ଥିତିରେ ଗୋଲେଇ ଚିହ୍ନ ଦିଆଯାଇ ଦିନ ଦଶଟାରୁ ବାରଟା ପର୍ଯ୍ୟନ୍ତ ଖୋଲା ଯାଇଥିଲା । ପରେ ବୌଦ୍ଧ ଥାନା ପକ୍ଷରୁ ଚଢ଼ାଉ କରାଯାଇ ବିଭିନ୍ନ ମଦଦୋକାନରେ କାର୍ଯ୍ୟ କରୁଥିବା 6 ଜଣ କର୍ମଚାରୀଙ୍କୁ ଅଟକ ରଖାଯାଇଥିଲା । ତେବେ ରାଣୀସାହିରେ ଥିବା ଦେଶୀ ମଦ ଦୋକାନରୁ ଛୋଟ ପିଲାଙ୍କ ଦ୍ବାରା ମଦ ନିଆଯାଉଥିବା ଦୃଶ୍ୟ ଆଜି ସୋସିଆଲ ମିଡିଆରେ ଚର୍ଚ୍ଚାର ବିଷୟ ହୋଇଥିଲା । ଯାହାକୁ ଜିଲ୍ଲାର ବୁଦ୍ଧିଜୀବୀ କଡା ସମାଲୋଚନା କରିଛନ୍ତି ।
ମଦଦୋକାନ ଖୋଲିବା ନେଇ ପ୍ରଶାସନ ପକ୍ଷରୁ କୌଣସି ନିର୍ଦ୍ଦେଶ ଦିଆଯାଇ ନଥିବା ଜିଲ୍ଲାପାଳ ପ୍ରକାଶ କରିଛନ୍ତି । ଏହା ସହ ଘଟଣାର ତଦନ୍ତ କରି ଦୃଢ ପଦକ୍ଷେପ ଗ୍ରହଣ କରାଯିବ ବୋଲି ଈଟିଭି ଭାରତକୁ ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
