ବୌଦ୍ଧ: ମୌସୁମୀ ବର୍ଷା ଆସନ୍ନ ପ୍ରାୟ । କିନ୍ତୁ ଏଯାବତ ମଣ୍ଡିରୁ ଉଠି ପାରୁନି ଧାନ । ତିନି କିଲୋଗ୍ରାମ ଧାନ କଟଣୀଛଟଣୀ ପରେ ମଧ୍ୟ ଗରିବ ଚାଷୀଙ୍କ ଧାନ ବିକ୍ରି ହୋଇ ନପାରିବାରୁ ଗୁରୁବାର ଗୁହାରୀ ଜଣାଇବାକୁ ଜିଲ୍ଲାପାଳଙ୍କ ନିକଟରେ ପହଞ୍ଚି ଥିଲେ ଚାଷୀ ।
ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ସିମିଳିପଦର ଗାଁ । ଗାଁ ଲୋକଙ୍କ ମୁଖ୍ୟ ବେଉସା ହେଲା ଧାନଚାଷ । ଧାନ ପୁଣି ଖରାଦିନେ ମୁଣ୍ଡଝାଳ ମୁଣ୍ଡରେ ମାରି ଜମିରେ ପାଣି ବଳେଇ ରବିଧାନ ଅମଳ କରିଥାଏ, କିନ୍ତୁ ମଣ୍ଡିରୁ ବିଭିନ୍ନ ସମସ୍ୟାରୁ ଧାନ ଉଠିପାରୁନି । ଆଗକୁ ବର୍ଷା ଆରମ୍ଭ ହେବାର ସମ୍ଭାବନା ଥିବାରୁ ବାଧ୍ୟ ହୋଇ ଗୁରୁବାର ସିମିଳିପଦର ଅଞ୍ଚଳର ଶତାଧିକ ଚାଷୀ ବୌଦ୍ଧ ଜିଲ୍ଲାପାଳଙ୍କୁ ଧାନ କ୍ରୟର ସୁବନ୍ଦୋବସ୍ତ କରାଇବାକୁ ଅନୁରୋଧ କରିଥିଲେ । ମଣ୍ଡିରେ ୨୪୮ ଜଣ ଚାଷୀଙ୍କ ନାମ ପଞ୍ଜୀକରଣ ହୋଇଥିବା ବେଳେ ବର୍ତ୍ତମାନ ସୁଦ୍ଧା ମାତ୍ର ୨୧ ଜଣଙ୍କ ଧାନ କ୍ରୟ ହୋଇଥିବାରୁ ଚିନ୍ତାରେ ପଡିଛନ୍ତି ଚାଷୀ । ଏପଟେ ଯୋଗାଣ ବିଭାଗ ଅତିଶୀଘ୍ର ସମସ୍ୟାର ସମାଧାନ ହୋଇଯିବ ବୋଲି କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
