ବୌଦ୍ଧ: ଜିଲ୍ଲାର ଡାଏରୀ ଫାର୍ମରେ କାର୍ଯ୍ୟରତ ଚତୁର୍ଥ ଶ୍ରେଣୀ କର୍ମଚାରୀ ସଂଘର ଅନିର୍ଦ୍ଦିଷ୍ଟ ଦିନ ଯାଏଁ ଗଣ ଧାରଣା । ସ୍ଥାୟୀ ଚାକିରି ଦାବିରେ ଏହି ଗଣ ଧାରଣାକୁ ଓହ୍ଲାଇଛନ୍ତି କର୍ମଚାରୀ । କୋଡିଏ ବର୍ଷରୁ ଊର୍ଦ୍ଧ୍ବ ସମୟ ଧରି କାର୍ଯ୍ୟରତ ଚତୁର୍ଥ ଶ୍ରେଣୀ କର୍ମଚାରୀ ବୁଧବାର ଠାରୁ ଅନିର୍ଦ୍ଦିଷ୍ଟ କାଳ ପାଇଁ ଧାରଣାରେ ବସିଛନ୍ତି ।
ସୂଚନା ଅନୁସାରେ ଦୀର୍ଘ ଦିନ ଧରି ଗାଈଗୋରୁଙ୍କ ସେବା କରିଆସିଥିଲେ ମଧ୍ୟ ସେମାନଙ୍କୁ ସ୍ଥାୟୀ କରାଯାଇ ନଥିବାରୁ ସେମାନେ ଏହି ନିଷ୍ପତ୍ତି ନେଇଥିବା ସୂଚନା ଦେଇଛନ୍ତି । ଅଭିଯୋଗ ଯେ ଏହି କର୍ମଚାରୀଙ୍କ ସୁବିଧା ଅସୁବିଧାରେ କେହି ଆହା କରୁ ନାହାଁନ୍ତି । ଦିନ ମଜୁରିଆ ହିସାବରେ ବାର, ତେର ଘଣ୍ଟା ଖଟୁଥିଲେ ବି ଅଧିକା ଦରମା ମିଳୁନାହିଁ । ଦୀର୍ଘ ଦିନ ହେଲାଣି ଗୋଟିଏ ଜାଗାରେ ପଡି ରହି ଦିନ ରାତି ମେହନତ କରୁଥିଲେ ବି ସ୍ଥାୟୀ ଚାକିରି ହୋଇ ପାରୁନାହିଁ । ଶେଷରେ ଉପାୟଶୂନ୍ୟ ଏହି ଅସ୍ଥାୟୀ କର୍ମଚାରୀମାନେ ଦାବି ପୂରଣ ନହେବା ଯାଏଁ ଗଣ ଧାରଣା ଦେଇଛନ୍ତି ।
ସୂଚନା ଅନୁସାରେ ବୌଦ୍ଧ ଡାଏରୀ ଫାର୍ମରେ ବର୍ତ୍ତମାନ ସମୟରେ କୋଡିଏଟି ଦୁହାଁଳିଆ ଜର୍ସି ଗାଈଙ୍କ ଠାରୁ ପ୍ରାୟ ନବେ ଲିଟର କ୍ଷୀର ପ୍ରତ୍ୟେହ ସଂଗ୍ରହ କରାଯାଉଛି । ଏହାସହ ବୌଦ୍ଧର ଜନସାଧାରଣଙ୍କୁ ସରକାରୀ ଦରରେ ବିକ୍ରି କରାଯାଇଥାଏ । ଏସବୁ କାର୍ଯ୍ୟରେ ଏହି ଅସ୍ଥାୟୀ ଚତୁର୍ଥ ଶ୍ରେଣୀ କର୍ମଚାରୀଙ୍କ ଭୂମିକା ଅଧିକ ରହିଥିବାବେଳେ ବର୍ତ୍ତମାନ ଏହି କାର୍ଯ୍ୟରେ ବାଧା ଉପୁଜିବା ଆଶଙ୍କା ରହିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
