ବୌଦ୍ଧ: ଶେଷରେ ଧରାପଡିଲା ବାଇକ ଚୋର । ବୌଦ୍ଧରେ ଗତ ପ୍ରାୟ ଏକମାସ ହେବ, ଲଗାତାର ଦାମୀ ମୋଟର ସାଇକେଲ ଚୋରି ନେଇ ଅଭିଯୋଗ ହେଉଥିଲା । ଶନିବାର ଭୈରବୀ ଛକରେ ସାପ୍ତାହିକ ହାଟ ଥିବାରୁ ଲୋକଙ୍କ ଭିଡ ରହିଥିଲା । ମୋଟର ସାଇକେଲ ରଖି ଲୋକେ ହାଟକୁ ପରିବା କିଣିବାକୁ ଯିବାପରେ ବାଇକ ଉପରେ ନଜର ରଖିଥିଲା ରାଜା ନାମକ ଚୋର । ଆଉ ସବୁଦିନ ପରି ପୁଣି ଏକ ଦାମୀ ବାଇକ ଚୋରି କରି, ଚମ୍ପଟ ମାରିବା ଲକ୍ଷ୍ୟରେ ଥିଲା ରାଜା ।
ତେବେ ଠିକ ସମୟରେ ଲୋକଙ୍କ ହାତରେ ଧରାପଡିଗଲା । ଏହାର ଏକ ଭିଡିଓ ବୌଦ୍ଧ ଅଞ୍ଚଳରେ ଭାଇରାଲ ହେବାରେ ଲାଗିଛି । ଅଭିଯୁକ୍ତ ଜଣକ ସୋନପୁର ଜିଲ୍ଲାର ହରଡଖୋଲ ନିକଟସ୍ଥ କଂସର ଗ୍ରାମର ରାଜା ମେହେର ବୋଲି ଜଣାପଡ଼ିଛି । ଲୋକେ ଚୋରକୁ କାବୁ କରି ଉତ୍ତମ ମଧ୍ୟମ ଦେବାପରେ ଥାନାରେ ଦେଇଛନ୍ତି ।
ବୌଦ୍ଧ ପୋଲିସ ପାଇଁ ମୁଣ୍ଡବ୍ୟଥାର କାରଣ ପାଲଟିଥିଲା ଏହି ଚୋର ଗ୍ୟାଙ୍ଗ । ଧରିବା ପାଇଁ ପଡୋଶୀ ଜିଲ୍ଲା ପୋଲିସର ଲଗାତାର ସମ୍ପର୍କରେ ଥିଲା ବୌଦ୍ଧ ପୋଲିସ । ସନ୍ଦେହରେ ଅନେକ ସ୍ଥାନରେ ଚଢାଉ ସହ କିଛି ଅଭିଯୁକ୍ତଙ୍କୁ ପୋଲିସ ଅଟକ ମଧ୍ୟ ରଖିଥିଲା । ମାତ୍ର ପ୍ରକୃତ ଚୋରକୁ ସ୍ଥାନୀୟ ଲୋକେ ଧରି ପୋଲିସରେ ଦେଇଛନ୍ତି । ତେବେ ସହରରେ ହୋଇଥିବା ସିରିଜ ବାଇକ ଚୋରି ପଛରେ, ଏକ ବଡ ଗ୍ୟାଙ୍ଗ ଥିବା ସନ୍ଦେହ କରାଯାଉଛି । ଏହି ଚୋର ଗ୍ୟାଙ୍ଗର ଚେର କେଉଁ ପର୍ଯ୍ୟନ୍ତ ଲମ୍ବିଛି, ତାହା ଜାଣିବାକୁ ବୌଦ୍ଧ ପୋଲିସ ଖୋଳତାଡ ଚଳାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
